barf

kal shab

jab sūraj ne

apnī āñkheñ mūñdīñ

apnā dāman khīñchā

aur havā kā sarpaT ghoḌā bāñdh diyā

aur falak par ik jānib se

chādar maTyālī sī taanī

pariyāñ

halke sīmīñ un ke par

raftār ḳhirāmāñ

utreñ

dhīre

dhīre

jaise par hoñ

dosh-e-havā par

utreñ

pariyāñ

mil kar

raqsāñ raqs kī lai maddham sī

aahaT raushan shabnam sī

lai halkī sur dhīmā

dhīmā

chāñdī sī chādar meñ pariyāñ

sīmīñ pariyāñ

ek tasalsul ek adā se utrīñ

utrīñ

shāḳh-e-shajar par

chhat par

dar par

farsh-e-siyah par

ye sab raushan the ujle the

jaise abraq

chupke chupke chheḌ rahī thiiñ

shāḳhoñ ke barbat ko

jaise niiñd meñ khoyā mutrib

apnī uñglī kī jumbish se

ḳhvāb-āvar naġhmāt jagā.e

hāthoñ meñ thā saaz anokhā

lab pe ḳhamoshī ke naġhme the

raqsāñ

raqs kī lai maddham sī

raqs meñ thiiñ

shab

sīmīñ pariyāñ

farsh thā ab ujlā ujlā sā

shāḳh-e-shajar kā

chhat kā

dar kā

chāñdī kā sā thā pairāhan

un ke lams meñ ik jaadū thā

har ik shai se

ek anokhī hīroñ jaise aab thī paidā

ūñchā peḌ sanobar kā

mauhūm asā hāthoñ meñ thāme

jashn-e-shab ko dekh rahā thā

rañgat us kī badlī badlī

yuuñ goyā thā

maiñ ne dekhā hai

raat kā raahī vaqt se pahle

ik mailī sī chādar oḌhe

gahrī niiñd meñ Duubā

naddī-nāle gum-sum

jharne chup chup

maiñ ne dekhā

ujlā ujlā ḳhema gul kā

shāḳh

shajar kā

chāñdī kā sā thā pairāhan

bharā huā thā chāñdī-far se

shab kā dāman

kal shab

jab suraj ne

apni aankhen mundin

apna daman khincha

aur hawa ka sarpaT ghoDa bandh diya

aur falak par ek jaanib se

chadar maTyali si tani

pariyan

halke simin un ke par

raftar KHiraman

utren

dhire

dhire

jaise par hon

dosh-e-hawa par

utren

pariyan

mil kar

raqsan raqs ki lai maddham si

aahaT raushan shabnam si

lai halki sur dhima

dhima

chandi si chadar mein pariyan

simin pariyan

ek tasalsul ek ada se utrin

utrin

shaKH-e-shajar par

chhat par

dar par

farsh-e-siyah par

ye sab raushan the ujle the

jaise abraq

chupke chupke chheD rahi thin

shaKHon ke barbat ko

jaise nind mein khoya mutrib

apni ungli ki jumbish se

KHwab-awar naghmat jagae

hathon mein tha saz anokha

lab pe KHamoshi ke naghme the

raqsan

raqs ki lai maddham si

raqs mein thin

shab

simin pariyan

farsh tha ab ujla ujla sa

shaKH-e-shajar ka

chhat ka

dar ka

chandi ka sa tha pairahan

un ke lams mein ek jadu tha

har ek shai se

ek anokhi hiron jaise aab thi paida

uncha peD sanobar ka

mauhum asa hathon mein thame

jashn-e-shab ko dekh raha tha

rangat us ki badli badli

yun goya tha

main ne dekha hai

raat ka rahi waqt se pahle

ek maili si chadar oDhe

gahri nind mein Duba

naddi-nale gum-sum

jharne chup chup

main ne dekha

ujla ujla KHema gul ka

shaKH

shajar ka

chandi ka sa tha pairahan

bhara hua tha chandi-far se

shab ka daman