barsat

hai dilātī yaad mai-noshī fazā barsāt kī

dil baḌhā jaatī hai aa aa kar ghaTā barsāt kī

bañdh ga.ī hai rahmat-e-haq se havā barsāt kī

naam khulne kā nahīñ letī ghaTā barsāt kī

ug rahā hai har taraf sabza dar-o-dīvār par

intihā garmī kī hai aur ibtidā barsāt kī

dekhnā sūkhī huī shāḳhoñ meñ bhī jaan aa ga.ī

haq meñ paudoñ ke masīhā hai havā barsāt kī

hoñ sharīk-e-bazm-e-mai zāhid bhī tauba toḌ kar

jhūmtī qible se uTThī hai ghaTā barsāt kī

asl to ye hai mai-o-māshūq kā jab lutf hai

chāñdnī ho raat ko din ko ghaTā barsāt kī

vo papīhoñ kī sadā.eñ aur vo moroñ kā raqs

vo havā-e-sarv aur kaalī ghaTā barsāt kī

paar utar jā.eñge bahr-e-ġham se riñd-e-bāda-nosh

le uḌegī kashtī-e-mai ko havā barsāt kī

ḳhud-baḳhud taaza umañgeñ josh par aane lagīñ

dil ko garmāne lagī ThanDī havā barsāt kī

vo duā.eñ mai-kashoñ kī aur vo lutf-e-intizār

haa.e kin nāzoñ se chaltī hai havā barsāt kī

maiñ ye samjhā abr ke rañgīn TukḌe dekh kar

taḳht pariyoñ ke uḌ laa.ī havā barsāt kī

naaz ho jis ko bahār-e-misr-o-shām-o-rūm par

sar-zamīn-e-hind meñ dekhe fazā barsāt kī

hai dilati yaad mai-noshi faza barsat ki

dil baDha jati hai aa aa kar ghaTa barsat ki

bandh gai hai rahmat-e-haq se hawa barsat ki

nam khulne ka nahin leti ghaTa barsat ki

ug raha hai har taraf sabza dar-o-diwar par

intiha garmi ki hai aur ibtida barsat ki

dekhna sukhi hui shaKHon mein bhi jaan aa gai

haq mein paudon ke masiha hai hawa barsat ki

hon sharik-e-bazm-e-mai zahid bhi tauba toD kar

jhumti qible se uTThi hai ghaTa barsat ki

asl to ye hai mai-o-mashuq ka jab lutf hai

chandni ho raat ko din ko ghaTa barsat ki

wo papihon ki sadaen aur wo moron ka raqs

wo hawa-e-sarw aur kali ghaTa barsat ki

par utar jaenge bahr-e-gham se rind-e-baada-nosh

le uDegi kashti-e-mai ko hawa barsat ki

KHud-baKHud taza umangen josh par aane lagin

dil ko garmane lagi ThanDi hawa barsat ki

wo duaen mai-kashon ki aur wo lutf-e-intizar

hae kin nazon se chalti hai hawa barsat ki

main ye samjha abr ke rangin TukDe dekh kar

taKHt pariyon ke uD lai hawa barsat ki

naz ho jis ko bahaar-e-misr-o-sham-o-rum par

sar-zamin-e-hind mein dekhe faza barsat ki