barsat ka mausam

ai hūr-e-jināñ jān-e-chaman rūh-e-nazāra

ai paikar-e-anvār-o-dil-āvez dil-ārā

vo yaad hai duzdīda nigāhoñ kā ishāra

qurbāñ terī āñkhoñ pe samarqand-o-buḳhārā

kaTtā nahīñ pardes meñ barsāt kā mausam

ai nāzish-e-kaunain sitam-kesh-o-sitam-gār

ai ḳhūnr-e-rag-e-abr-e-ravāñ jān-e-chaman-zār

ai sāz-e-mohabbat kī machaltī huī jhankār

merā koī sāthī hai na hamdam hai na ġham-ḳhvār

kaTtā nahīñ pardes meñ barsāt kā mausam

ye zulmat-e-shab aur ye garajte hue bādal

zulmat meñ mahakte hue taḳh.īl ke āñchal

taare bhī haiñ āñkhoñ meñ lagā.e hue kājal

ik dil hai faqat paas ki bujhtī huī mash.al

kaTtā nahīñ pardes meñ barsāt kā mausam

yaad aatī haiñ rah rah ke mujhe terī nigāheñ

vo reshmī āñchal meñ jhalaktī huī bāñheñ

tujh bin to haiñ vīrān chaman-zār kī rāheñ

ye sard havā.eñ haiñ ki dhunkī huī aaheñ

kaTtā nahīñ pardes meñ barsāt kā mausam

maiñ ne to ye chāhā ki tujhe dil se bhulā duuñ

siine se tire naqsh-e-mohabbat ko miTā duuñ

lekin ye batā dil ko kahāñ jā ke chhupā duuñ

kis tarah dahakte hue sho.ale ko bujhā duuñ

kaTtā nahīñ pardes meñ barsāt kā mausam

maiñ apnī tamannāoñ se jazbāt se majbūr

aur tū hai udhar rasm-o-rivāyāt se majbūr

insān hai farsūda ḳhayālāt se majbūr

bulbul hai yahāñ gul kī mulāqāt se majbūr

kaTtā nahīñ pardes meñ barsāt kā mausam

ai hur-e-jinan jaan-e-chaman ruh-e-nazara

ai paikar-e-anwar-o-dil-awez dil-ara

wo yaad hai duzdida nigahon ka ishaara

qurban teri aankhon pe samarqand-o-buKHara

kaTta nahin pardes mein barsat ka mausam

ai nazish-e-kaunain sitam-kesh-o-sitam-gar

ai KHunr-e-rag-e-abr-e-rawan jaan-e-chaman-zar

ai saz-e-mohabbat ki machalti hui jhankar

mera koi sathi hai na hamdam hai na gham-KHwar

kaTta nahin pardes mein barsat ka mausam

ye zulmat-e-shab aur ye garajte hue baadal

zulmat mein mahakte hue taKHil ke aanchal

tare bhi hain aankhon mein lagae hue kajal

ek dil hai faqat pas ki bujhti hui mashal

kaTta nahin pardes mein barsat ka mausam

yaad aati hain rah rah ke mujhe teri nigahen

wo reshmi aanchal mein jhalakti hui banhen

tujh bin to hain viran chaman-zar ki rahen

ye sard hawaen hain ki dhunki hui aahen

kaTta nahin pardes mein barsat ka mausam

main ne to ye chaha ki tujhe dil se bhula dun

sine se tere naqsh-e-mohabbat ko miTa dun

lekin ye bata dil ko kahan ja ke chhupa dun

kis tarah dahakte hue shoale ko bujha dun

kaTta nahin pardes mein barsat ka mausam

main apni tamannaon se jazbaat se majbur

aur tu hai udhar rasm-o-riwayat se majbur

insan hai farsuda KHayalat se majbur

bulbul hai yahan gul ki mulaqat se majbur

kaTta nahin pardes mein barsat ka mausam