bas ana ko bahaal rakhna hai

apne apne hī ḳhol meñ ham tum

kaise ḳhud ko chhupā ke baiTh ga.e

ham ko apnī anā kā paas rahā

aur saare ḳhayāl bhuul ga.e

ḳhvāb jo ham ne saath dekhe the

saare vo kaise taar taar hue

saare va.ade vafā ke TuuT ga.e

aur armān sab hī ḳhaak hue

dekhne meñ to maiñ shagufta huuñ

tum bhī shādāb sab ko lagte ho

ik haqīqat magar maiñ jāntī huuñ

ye ba-zāhir nazar jo aatā hai

aa.ina vo hamāre dil kā nahīñ

ham to ik dūsre kī furqat meñ

zinda rahnā muhāl kahte the

aks vo bhī hamārī zaat kā thā

aks ye bhī hamārī zaat kā hai

hai udāsī to chāroñ-samt magar

zeb-tan kar ke ḳhol ḳhushiyoñ kā

ham ko apnā bharam bhī rakhnā hai

chāhe ġham ke pahāḌ jitne gireñ

bas anā ko bahāl rakhnā hai

apne apne hi KHol mein hum tum

kaise KHud ko chhupa ke baiTh gae

hum ko apni ana ka pas raha

aur sare KHayal bhul gae

KHwab jo hum ne sath dekhe the

sare wo kaise tar tar hue

sare wade wafa ke TuT gae

aur arman sab hi KHak hue

dekhne mein to main shagufta hun

tum bhi shadab sab ko lagte ho

ek haqiqat magar main jaanti hun

ye ba-zahir nazar jo aata hai

aaina wo hamare dil ka nahin

hum to ek dusre ki furqat mein

zinda rahna muhaal kahte the

aks wo bhi hamari zat ka tha

aks ye bhi hamari zat ka hai

hai udasi to chaaron-samt magar

zeb-tan kar ke KHol KHushiyon ka

hum ko apna bharam bhi rakhna hai

chahe gham ke pahaD jitne giren

bas ana ko bahaal rakhna hai