bas itna sochta rahta hun

ik pyārā bachcha maiñ bhī huuñ

āñkhoñ kā taarā maiñ bhī huuñ

mire ham-jolī aur ham-umr

jab ilm kī raah par chalte haiñ

to aise pyāre lamhoñ meñ

kyoñ mere chhoTe hāthoñ meñ

koī varaq nahīñ koī lafz nahīñ

auzār haiñ bas sab lohe ke

kyoñ mere kapḌe gande haiñ

kyoñ barsoñ se ye aise haiñ

maiñ ḳhud bhī to ik phuul huuñ

naañ

phir phūloñ ko kyoñ bechtā huuñ

maiñ sāhab ke na.e bōToñ par

kyoñ sub.h polish phertā huuñ

gar aisā karnā na chāhūñ

kyoñ mujh par haath phir uThtā hai

kyoñ baaġh kā har ik kāñTā hī

mere pairoñ meñ chubhtā hai

phūloñ jaisā to maiñ bhī huuñ

tāroñ jaisā to maiñ bhī huuñ

ai rab terī is dhartī par

chandā jaisā to maiñ bhī huuñ

bas itnā pūchhnā chāhtā huuñ

bas itnā sochtā rahtā huuñ

gar sab bachchoñ jaisā huuñ maiñ

to bachcha kyoñ nahīñ lagtā huuñ

ek pyara bachcha main bhi hun

aankhon ka tara main bhi hun

mere ham-joli aur ham-umr

jab ilm ki rah par chalte hain

to aise pyare lamhon mein

kyon mere chhoTe hathon mein

koi waraq nahin koi lafz nahin

auzar hain bas sab lohe ke

kyon mere kapDe gande hain

kyon barson se ye aise hain

main KHud bhi to ek phul hun

nan

phir phulon ko kyon bechta hun

main sahab ke nae booTon par

kyon subh polish pherta hun

gar aisa karna na chahun

kyon mujh par hath phir uThta hai

kyon bagh ka har ek kanTa hi

mere pairon mein chubhta hai

phulon jaisa to main bhi hun

taron jaisa to main bhi hun

ai rab teri is dharti par

chanda jaisa to main bhi hun

bas itna puchhna chahta hun

bas itna sochta rahta hun

gar sab bachchon jaisa hun main

to bachcha kyon nahin lagta hun