bas lauT aana

sachchā.iyāñ apne vaqt meñ

kabhī jī nahīñ pātīñ

sau āñkhoñ ne hamesha

lamhoñ se dhoke khaa.e

tumheñ kaise ruḳhsat karūñ

ki ye baat imām-zāmin aur duā se

bahut aage bahut aage hai

hatheliyoñ ke gardāb phisalte phisalte

bīnā.ī kī dahlīz pe aa baiThe haiñ

uñgliyāñ kānoñ ko kahāñ tak dastak se duur rakheñgī

duāoñ kī chhatrī meñ aksar

sūrāḳh rah jaate haiñ

maiñ tumheñ kaun sī chādar tohfa duuñ

ki āj-kal jaulāñ hai

izzat se zyāda kāġhaz kamāne ke chakkar meñ haiñ

maiñ ne muTThī khol kar dekhī

to sab lakīroñ se zyāda bāñjh niklīñ

mere paas sabz nahīñ haiñ

ki zard pattoñ kī vus.at ne ḳhaak se niil tak

sarsoñ kā mausam kā shat kar rakhā hai

mere paas kuchh bhī nahīñ

bas lauT aanā

ki tumhāre aane tak

merī āñkheñ tīrgī kī salāḳhoñ meñ qaid raheñgī

sachchaiyan apne waqt mein

kabhi ji nahin patin

sau aankhon ne hamesha

lamhon se dhoke khae

tumhein kaise ruKHsat karun

ki ye baat imam-zamin aur dua se

bahut aage bahut aage hai

hatheliyon ke gardab phisalte phisalte

binai ki dahliz pe aa baiThe hain

ungliyan kanon ko kahan tak dastak se dur rakhengi

duaon ki chhatri mein aksar

suraKH rah jate hain

main tumhein kaun si chadar tohfa dun

ki aaj-kal jaulan hai

izzat se zyaada kaghaz kamane ke chakkar mein hain

main ne muTThi khol kar dekhi

to sab lakiron se zyaada banjh niklin

mere pas sabz nahin hain

ki zard patton ki wusat ne KHak se nil tak

sarson ka mausam ka shat kar rakha hai

mere pas kuchh bhi nahin

bas lauT aana

ki tumhaare aane tak

meri aankhen tirgi ki salaKHon mein qaid rahengi