basarat

tumhāre lams kī ḳhushbū ne sandal kar diyā hai

ki maiñ pāgal thī tum ne aur pāgal kar diyā hai

tamāzat hijr kī phir se badan jhulsā rahī thī

tumhārī yaad ko phir ham ne bādal kar diyā hai

hamāre vāste āsāñ nahīñ thā phir bhī ham ne

tumheñ lipTā ke tum ko apnā āñchal kar diyā hai

muqaddar kī siyāhī aaj kuchh to kaam aa.ī

sajā ke aañkh meñ is ko bhī kājal kar diyā hai

maiñ sahrā kī tarah banjar thī lekin ai mirī jaañ

tumhāre pyaar kī bārish ne jal-thal kar diyā hai

yahāñ ik hañstā-bastā shahrā hotā thā 'tabassum'

jise insān kī vahshat ne jangal kar diyā hai

tumhaare lams ki KHushbu ne sandal kar diya hai

ki main pagal thi tum ne aur pagal kar diya hai

tamazat hijr ki phir se badan jhulsa rahi thi

tumhaari yaad ko phir hum ne baadal kar diya hai

hamare waste aasan nahin tha phir bhi hum ne

tumhein lipTa ke tum ko apna aanchal kar diya hai

muqaddar ki siyahi aaj kuchh to kaam aai

saja ke aankh mein is ko bhi kajal kar diya hai

main sahra ki tarah banjar thi lekin ai meri jaan

tumhaare pyar ki barish ne jal-thal kar diya hai

yahan ek hansta-basta shahra hota tha 'tabassum'

jise insan ki wahshat ne jangal kar diya hai