baste mein bachpan

bhuul gayā thā bachpan ko maiñ

apnī kitāboñ ke safhoñ ke andar shāyad

ik kāġhaz ke purze ko tah kar ke jaise

rakh dete haiñ

ab lauTā huuñ barsoñ baa'd to yuuñ lagtā hai

pagDanDī jo lañgDā lañgDā kar chaltī thī

lekin jis kī muḌī-tuḌī uñglī thāme maiñ

rozāna schōl ko jaate

lauT ke aate

sīdhā chalnā siikh gayā thā

ab bhī vahīñ hai

galī vahī hai

nukkaḌ par ab bhī ik būḌhā

gaaḌe maile kapḌe kī jholī phailā.e

chehre kī jhurriyoñ meñ chhupī āñkhoñ se

har aane jaane vaale ko taktā

ik dūsre ke mil jaane kī aas lagā.e

din bhar yuñhī baiThā rahegā

taktā rahegā

pagDanDī bhī galī bhī aur būḌhā bhik-mangā

sab mere dekhe-bhāle haiñ lekin mujh ko

kyoñ lagtā hai jaise in barsoñ meñ sab kuchh badal gayā hai

vo jo apne rā'sha-zada hāthoñ ko

mere sar par rakh kar mujh ko du'ā.eñ dete thakte nahīñ the

merī balā.eñ le kar mujh ko ek nayā jīvan dete the

vo saare to ab duniyā ko chhoḌ chuke haiñ

baiThak aur chaupāl sabhī chup-chāp paḌe haiñ

uuñgh rahe haiñ

gaañv ke bāhar Dhīlā-Dhālā

aadhā soyā aadhā jaagā

chauk jo ik suunā rasta thā

ab to vahāñ bāzār sajā hai

bhiiḌ lagī hai

shor-o-ġhul paḌā hai

gaañv shāyad qasba bante bante ruk kar

ik pal ke vaqfe meñ jaise Thahar gayā hai

us gaañv ko apnā kahne meñ ab

mujh ko kuchh sankoch sā hotā to hai lekin

maiñ gar apnā basta khol ke

khoyā bachpan DhūñDh nikālūñ

lañgDātī pagDanDī kī uñglī thāme schōl ke ik do chakkar kāTūñ

to phir mumkin hai maiñ

us gaañv ko apnā kah pā.ūñgā

bhul gaya tha bachpan ko main

apni kitabon ke safhon ke andar shayad

ek kaghaz ke purze ko tah kar ke jaise

rakh dete hain

ab lauTa hun barson ba'd to yun lagta hai

pagDanDi jo langDa langDa kar chalti thi

lekin jis ki muDi-tuDi ungli thame main

rozana school ko jate

lauT ke aate

sidha chalna sikh gaya tha

ab bhi wahin hai

gali wahi hai

nukkaD par ab bhi ek buDha

gaDe maile kapDe ki jholi phailae

chehre ki jhurriyon mein chhupi aankhon se

har aane jaane wale ko takta

ek dusre ke mil jaane ki aas lagae

din bhar yunhi baiTha rahega

takta rahega

pagDanDi bhi gali bhi aur buDha bhik-manga

sab mere dekhe-bhaale hain lekin mujh ko

kyon lagta hai jaise in barson mein sab kuchh badal gaya hai

wo jo apne ra'sha-zada hathon ko

mere sar par rakh kar mujh ko du'aen dete thakte nahin the

meri balaen le kar mujh ko ek naya jiwan dete the

wo sare to ab duniya ko chhoD chuke hain

baiThak aur chaupal sabhi chup-chap paDe hain

ungh rahe hain

ganw ke bahar Dhila-Dhaala

aadha soya aadha jaga

chauk jo ek suna rasta tha

ab to wahan bazar saja hai

bhiD lagi hai

shor-o-ghul paDa hai

ganw shayad qasba bante bante ruk kar

ek pal ke waqfe mein jaise Thahar gaya hai

us ganw ko apna kahne mein ab

mujh ko kuchh sankoch sa hota to hai lekin

main gar apna basta khol ke

khoya bachpan DhunDh nikalun

langDati pagDanDi ki ungli thame school ke ek do chakkar kaTun

to phir mumkin hai main

us ganw ko apna kah paunga