بتاؤ تو

آؤ بچو باتیں بتاؤ

دیش کا اپنے نقشہ بناؤ

گنگا ندی ہے کہاں سے نکلی

کہاں کہاں یہ جا کر پھیلی

سنگم کا وہ کون نگر ہے

جس پر سب کی لگی نظر ہے

جھانسی کیوں مشہور ہوئی ہے

کس کے نام سے وہ چمکی ہے

کیسے امر پنجاب بنا ہے

کون وہاں مشہور ہوا ہے

کہاں ہوئے گاندھی جی پیدا

کام انہوں نے کیے ہیں کیا کیا

کون تھے شوکتؔ کون تھے جوہرؔ

کیوں ہے ان کا چرچا گھر گھر

پیدا ہوئے اشفاقؔ کہاں پر

نام ہے کیوں ہر ایک زباں پر

دیش کا اپنے کون نگر ہے

جو جنت سے بھی بڑھ کر ہے

دلی کو ہم کیا ہیں کہتے

جہاں سفیر ہر ملک کے رہتے