baTla house

ghaḌī kī Tik-Tik bol rahī hai raat ke shāyad ek baje haiñ

baTla house kī ek galī meñ moTe kutte bhauñk rahe haiñ

ek khañDar meñ tez raushnī chāroñ jānib phail rahī hai

baġhal meñ leTā sāthī merā ab tak pub jī khel rahā hai

maiñ bhī ab tak jaag rahā huuñ āñkheñ mūñde soch rahā huuñ

nīche jaanā kaisā hogā bāhar kitnī sardī hogī

qutub sitāra kidhar ko hogā raat kī raanī kaisī hogī

sub.h kā sūraj kahāñ pe hogā abhī ḳhudā kyā kartā hogā

saḌak kināre sone vaale joḌe kaise sote hoñge

in ko machchhar kāTte hoñge

naum chomsky lawn meñ baiThe bachche āḳhir kaise hoñge

un ko kutte chāTte hoñge

kyā in bhūk-zada bachchoñ ke ḳhvāb meñ pariyāñ aatī hoñgī

kaTe-phaTe hāthoñ ke takiye ke nīche kuchh rakhtī hoñgī

kaisī bāteñ karte ho jī kyā pariyoñ kā kaam yahī hai

mahal sarā.e chhoḌ ke ab vo saḌak kināre ā.eñgī kyā

raat ke shāyad DeḌh baje haiñ baTla house kā chauk khulā hai

raat ko job se aane vaale raat meñ job ko jaane vaale

ek haath meñ liye chaa.e cup ek haath meñ chhoTī cigarette

saḌak paar kyoñ dekh rahe haiñ

biryānī ko DhūñDh rahe haiñ

un ke pīchhe saḌak kināre qabristān kā gate khulā hai

andar kutte ghuum rahe haiñ shāyad khānā DhūñDh rahe haiñ

bāhar cigarette aur coffē hai andar kaafī tārīkī hai

maiñ bhī andar jhāñk rahā huuñ haule haule soch rahā huuñ

qabristān ke andar meñ ye latrine kis ne banvāyā

kyoñ banvāyā

shāyad murde raat meñ uTh kar us ke andar jaate hoñge

hājat puurī karte hoñge

yā phir cigarette piine vaale laḌke andar jaate hoñge

ḳhākī vardī ghar vāloñ se chhup kar cigarette piite hoñge

ek kināre adab kī malika sab kuchh baiThī dekh rahī hai

aag kā dariyā chāñdnī begam shīshe kā ghar likhne vaalī

ainī aapā soch rahī hai

merā qaarī kyoñ aayā hai

shāyad is ko gautam shañkar tal.at ne uljhāyā hogā

yā phir us ko ḳhayābāñ kī champā ne paglāyā hogā

yā phir is pāgal laḌke ne shu.ūr kī rau ko chheḌā hogā

yā phir is ne aag kā dariyā aadhā paḌh kar chhoḌā hogā

falsafyāna bāteñ sun kar saare murde sochte hoñge

koī apnī ḳhvāb-gāh ko chhoḌ ke āḳhir kyoñ aayā hai

maiñ bhī baiThā soch rahā huuñ

itnī raat ko kyoñ aayā huuñ

ghaDi ki Tik-Tik bol rahi hai raat ke shayad ek baje hain

baTla house ki ek gali mein moTe kutte bhaunk rahe hain

ek khanDar mein tez raushni chaaron jaanib phail rahi hai

baghal mein leTa sathi mera ab tak pub ji khel raha hai

main bhi ab tak jag raha hun aankhen munde soch raha hun

niche jaana kaisa hoga bahar kitni sardi hogi

qutub sitara kidhar ko hoga raat ki rani kaisi hogi

subh ka suraj kahan pe hoga abhi KHuda kya karta hoga

saDak kinare sone wale joDe kaise sote honge

in ko machchhar kaTte honge

naum chomsky lawn mein baiThe bachche aaKHir kaise honge

un ko kutte chaTte honge

kya in bhuk-zada bachchon ke KHwab mein pariyan aati hongi

kaTe-phaTe hathon ke takiye ke niche kuchh rakhti hongi

kaisi baaten karte ho ji kya pariyon ka kaam yahi hai

mahal sarae chhoD ke ab wo saDak kinare aaengi kya

raat ke shayad DeDh baje hain baTla house ka chauk khula hai

raat ko job se aane wale raat mein job ko jaane wale

ek hath mein liye chae cup ek hath mein chhoTi cigarette

saDak par kyon dekh rahe hain

biryani ko DhunDh rahe hain

un ke pichhe saDak kinare qabristan ka gate khula hai

andar kutte ghum rahe hain shayad khana DhunDh rahe hain

bahar cigarette aur coffee hai andar kafi tariki hai

main bhi andar jhank raha hun haule haule soch raha hun

qabristan ke andar mein ye latrine kis ne banwaya

kyon banwaya

shayad murde raat mein uTh kar us ke andar jate honge

hajat puri karte honge

ya phir cigarette pine wale laDke andar jate honge

KHaki wardi ghar walon se chhup kar cigarette pite honge

ek kinare adab ki malika sab kuchh baiThi dekh rahi hai

aag ka dariya chandni begam shishe ka ghar likhne wali

aini aapa soch rahi hai

mera qari kyon aaya hai

shayad is ko gautam shankar talat ne uljhaya hoga

ya phir us ko KHayaban ki champa ne paglaya hoga

ya phir is pagal laDke ne shuur ki rau ko chheDa hoga

ya phir is ne aag ka dariya aadha paDh kar chhoDa hoga

falsafyana baaten sun kar sare murde sochte honge

koi apni KHwab-gah ko chhoD ke aaKHir kyon aaya hai

main bhi baiTha soch raha hun

itni raat ko kyon aaya hun