bayaad-e-shamim kirhani

uf ye pichhle pahar kā sannāTā

zehn par Dañk mārtā jaa.e

ek ik zaḳhm ubhārtā jaa.e

bhūlā-bisrā huā sā ik chehra

mere ashkoñ meñ Duub kar niklā

aur mere larazte hoñToñ par

saj gayā ek aah kī sūrat

aisī lambī karāh kī sūrat

chiir kar dil ko jo nikaltī hai

be-riyā.ī ḳhulūs lutf-o-karam

ḳhush-dilī mehrbāniyāñ shafqat

husn-e-shabnam-mizājiyāñ nik.hat

zindagī kā salīqa-e-musbat

āgahī aql ilmiyat tahzīb

dil-nashīñ dūr-bīnī dīda-varī

sheriyat kā shu.ūr ḳhush-nazarī

rañg aatā hai rañg jaatā hai

aur vo bhūlā-bisrā sā chehrā

choT dil par mire lagātā hai

baḌhtī jaatī hai zaḳhmoñ kī ta.adād

baḌhtā jaatā hai dard siine kā

hausla ab nahīñ hai jiine kā

yād-e-māzī azaab hai yārab

uf ye pichhle pahar ka sannaTa

zehn par Dank marta jae

ek ek zaKHm ubhaarta jae

bhula-bisra hua sa ek chehra

mere ashkon mein Dub kar nikla

aur mere larazte honTon par

saj gaya ek aah ki surat

aisi lambi karah ki surat

chir kar dil ko jo nikalti hai

be-riyai KHulus lutf-o-karam

KHush-dili mehrbaniyan shafqat

husn-e-shabnam-mizajiyan nikhat

zindagi ka saliqa-e-musbat

aagahi aql ilmiyat tahzib

dil-nashin dur-bini dida-wari

sheriyat ka shuur KHush-nazari

rang aata hai rang jata hai

aur wo bhula-bisra sa chehra

choT dil par mere lagata hai

baDhti jati hai zaKHmon ki tadad

baDhta jata hai dard sine ka

hausla ab nahin hai jine ka

yaad-e-mazi azab hai yarab