be-abaad gharon ka nauha

be-ābād gharoñ meñ aisā hotā hai

duur ke des ko jaane vaalā kolhū kā ek bail banā hai

har pahlī ko harkāre ke haath meñ ek money-order kā rasta taktī

baap kī āñkheñ ḳhushī ḳhushī tasbīh ke daane jaldī jaldī pher rahī haiñ

bahneñ dollar ke ta.avīz banā kar gale meñ Daale ghuum rahī haiñ

bhaa.ī apne yāroñ meñ pardes ke qisse rang-birangī āvāzoñ meñ haañk rahe haiñ

ḳhush-fahmī kī maarī biivī apnī javānī umr ke calender meñ rakh kar kāmoñ meñ lag jaatī hai

maañ dīvār pe baiThe kavve kī āvāz ko sun kar ḳhush hotī hai

duur ke des meñ

kolhū kā vo bail bechāra

raat ko thak kar so jaatā hai

be-ābād gharoñ meñ aksar

aisā ho jaatā hai

be-abaad gharon mein aisa hota hai

dur ke des ko jaane wala kolhu ka ek bail bana hai

har pahli ko harkare ke hath mein ek money-order ka rasta takti

bap ki aankhen KHushi KHushi tasbih ke dane jaldi jaldi pher rahi hain

bahnen dollar ke tawiz bana kar gale mein Dale ghum rahi hain

bhai apne yaron mein pardes ke qisse rang-birangi aawazon mein hank rahe hain

KHush-fahmi ki mari biwi apni jawani umr ke calender mein rakh kar kaamon mein lag jati hai

man diwar pe baiThe kawwe ki aawaz ko sun kar KHush hoti hai

dur ke des mein

kolhu ka wo bail bechaara

raat ko thak kar so jata hai

be-abaad gharon mein aksar

aisa ho jata hai