be-aman

yahī vaqt thā

haañ yahī vaqt thā

balki tārīḳh bhī to yahī thī

jab ik mehrbāñ haath ne

jaane kyā soch kar bas achānak

mirī ruuh ko thapthapāyā

mire dil ko thāmā

ajab ek vāraftagī se

aur kuchh pur-fusūñ āgahī se

mire sin-rasīda

dil-o-jāñ ko us ne

hayāt-āfrīñ lams se bhar diyā

apnī nazroñ meñ ḳhud mo'atabar kar diyā

sochtā huuñ anokhī thiiñ vo sā.ateñ kis qadar

kyā ajab merī aql-o-ḳhirad par asar thā

zamānoñ jahānoñ se maiñ be-ḳhabar thā

sitāre zamīñ āsmāñ kahkashāñ sab mire paañv kī dhuul the

havā bhī ki jis samt chaltī mire hukm se

aur ḳhushbū ki pahlū badaltī mire hukm se

maiñ ki masrūf thā roz-o-shab bādaloñ ke safar meñ

maiñ dil thā nazar thā havā thā ḳhudā thā kisī kī nazar meñ

ki be-misl yaktā yagāna thā maiñ apne har ik hunar meñ

mirī tābnākī mirā nūr-e-kāmil thā shams-o-qamar meñ

magar ek din phir achānak

ajab sāneha ho gayā

aur jaise mirā baḳht hī so gayā

iḳhtiyār-o-tafāḳhur kā vo silsila kho gayā

ab to bas maiñ huuñ aur mātam-e-ārzū

zindagī kuchh nahīñ mā-sivā hā-o-hū

dam-ba-dam dam-ba-dam hārtī justujū

ek āvāz aise meñ aatī huī

dil kī himmat dobāra bañdhātī huī

kah rahī hai musalsal ki ye ḳhvāb hai

ḳhauf hai vahm hai sehr hai

is ko hargiz haqīqat na jaan

aur maiñ zindagī maut ke darmiyāñ

tā-ba-hadd-e-karāñ be-amāñ be-amāñ be-amāñ

yahi waqt tha

han yahi waqt tha

balki tariKH bhi to yahi thi

jab ek mehrban hath ne

jaane kya soch kar bas achanak

meri ruh ko thapthapaya

mere dil ko thama

ajab ek waraftagi se

aur kuchh pur-fusun aagahi se

mere sin-rasida

dil-o-jaan ko us ne

hayat-afrin lams se bhar diya

apni nazron mein KHud mo'atabar kar diya

sochta hun anokhi thin wo saaten kis qadar

kya ajab meri aql-o-KHirad par asar tha

zamanon jahanon se main be-KHabar tha

sitare zamin aasman kahkashan sab mere panw ki dhul the

hawa bhi ki jis samt chalti mere hukm se

aur KHushbu ki pahlu badalti mere hukm se

main ki masruf tha roz-o-shab baadalon ke safar mein

main dil tha nazar tha hawa tha KHuda tha kisi ki nazar mein

ki be-misl yakta yagana tha main apne har ek hunar mein

meri tabnaki mera nur-e-kaamil tha shams-o-qamar mein

magar ek din phir achanak

ajab saneha ho gaya

aur jaise mera baKHt hi so gaya

iKHtiyar-o-tafaKHur ka wo silsila kho gaya

ab to bas main hun aur matam-e-arzu

zindagi kuchh nahin ma-siwa ha-o-hu

dam-ba-dam dam-ba-dam haarti justuju

ek aawaz aise mein aati hui

dil ki himmat dobara bandhati hui

kah rahi hai musalsal ki ye KHwab hai

KHauf hai wahm hai sehr hai

is ko hargiz haqiqat na jaan

aur main zindagi maut ke darmiyan

ta-ba-hadd-e-karan be-aman be-aman be-aman