be-bak andhere

jab kabhī shab ke tilismāt meñ kho jaatā huuñ

yā tire husn kī āġhosh meñ so jaatā huuñ

terī tasvīr ubhartī hai pas-e-parda-e-ḳhvāb

ek TuuTe hue be-laus sitāre kī tarah

chiir kar sīna-e-āfāq kī tārīk fazā

az-rāh-e-vafā terī tasvīr uThā letā huuñ

āriz-o-lab ke javāñ giit churā letā huuñ

duur tak jāda-e-fardā pe mahak uThte haiñ

ummīd ke phuul ḳhvāb-e-fardā ke gulāb

jagmagāte haiñ mire dal ke charāġh

aur jab sarhad-e-idrāk pe siine se lagā.e hue tasvīr tirī

saañs letā huuñ Thahar jaatā huuñ

nā-gahāñ

āñdhiyāñ chaltī haiñ uḌātī huī dhuul

ġham ke tūfān machal jaate haiñ

terī tasvīr ke ubhre hue sab naqsh-o-nigār

jā ke bebāk añdheroñ se lipaT jaate haiñ

jab kabhi shab ke tilismat mein kho jata hun

ya tere husn ki aaghosh mein so jata hun

teri taswir ubharti hai pas-e-parda-e-KHwab

ek TuTe hue be-laus sitare ki tarah

chir kar sina-e-afaq ki tarik faza

az-rah-e-wafa teri taswir uTha leta hun

aariz-o-lab ke jawan git chura leta hun

dur tak jada-e-farda pe mahak uThte hain

ummid ke phul KHwab-e-farda ke gulab

jagmagate hain mere dal ke charagh

aur jab sarhad-e-idrak pe sine se lagae hue taswir teri

sans leta hun Thahar jata hun

na-gahan

aandhiyan chalti hain uDati hui dhul

gham ke tufan machal jate hain

teri taswir ke ubhre hue sab naqsh-o-nigar

ja ke bebak andheron se lipaT jate hain