be-faiz mausam ki rafaqat mein

ḳhudāvandā

tujhe ma.alūm hai maiñ ne

ye apnī umr

kis be-faiz mausam kī rifāqat meñ guzārī hai

yaqīn-o-be-yaqīnī kī aziyyat meñ guzārī hai

ḳhudāvandā

tujhe ma.alūm hai mere

har ik jānib tirī sau ne.amateñ

bikhrī huī thiiñ

hazāroñ rāste the

manzileñ thiiñ

raushnī thī

rañg the ḳhushbū thī

phūloñ se ladī shāḳheñ thiiñ ḳhvāhish kī

tamannā.eñ laboñ par muskurāhaT ke

ka.ī naġhme sajā.e raqs kartī thiiñ

ka.ī jugnū mirī shāmoñ ke āñgan se guzarte the

mirī har aarzū kī apnī peshānī thī aur un se

ka.ī sūraj ubharte the

ka.ī mahtāb chehre

jhiil sī āñkheñ liye mere ta.āqub meñ nikalte the

mujhe āvāz de kar

rokne kī koshisheñ karte na thakte the

ka.ī dildār mausam the

ki jin meñ titliyāñ bārish ke rañgoñ meñ nahātī

haath phailātī

mare qurb-o-javār dīda-o-dil se guzartī thiiñ

magar maiñ ne

ḳhudāvandā

tujhe ma.alūm hai maiñ ne

tirī saarī ināyat ko

tirī un ne.amatoñ ko aañkh bhar kar bhī nahīñ dekhā

ḳhudāvandā

tujhe ma.alūm hai

tū jāntā hai

ki mire dil aur mirī āñkhoñ meñ bas vo

mausam-e-dil-dār bastā thā

isī mausam kī chāhat

aur mohabbat kā kahīñ

iqrār bastā thā

isī mausam ko dil ne apnī sub.h-shām jaanā thā

agarche raah meñ aayā huā saarā zamāna thā

ḳhudāvandā tujhe ma.alūm hai

tū jāntā hai

diloñ ke zaḳhm

aur āñkhoñ kī saarī kaifiyat pahchāntā hai

magar maiñ ne

use jānāna pahchānā

mujhe jo bhī kahā us ne

usī ko zindagī jaanā

usī ko raushnī jaanā

ḳhudāvandā

tujhe ma.alūm hai us ne

basar kī zindagī merī

churā lī raushnī merī

tujhe ma.alūm hai sab kuchh

ḳhudāvandā tujhe ma.alūm hai sab kuchh

mirī umr-e-guzishta kā

mirī umr-e-ravāñ kā

ek ik lamha

usī be-faiz mausam kī rifāqat ke hī kaam aayā

magar ab maiñ

ḳhudāvandā

magar ab maiñ mohabbat ke

usī be-faiz mausam kī rifāqat ke

azāboñ

aur ḳhvāboñ se

thakā-hārā huā insān

rihā.ī chāhtā huuñ

tirī sau ne.amateñ haiñ

un se tanhā.ī kī ne.amat chāhtā huuñ

ḳhudāvandā tujhe ma.alūm hai maiñ ne

ye apnī umr kas be-faiz mausam kī rifāqat meñ guzārī hai

yaqīn-o-be-yaqīnī kī aziyyat meñ guzārī hai

ḳhudāvandā

mujhe tanhā.ī kī ne.amat atā kar de

KHudawanda

tujhe malum hai main ne

ye apni umr

kis be-faiz mausam ki rifaqat mein guzari hai

yaqin-o-be-yaqini ki aziyyat mein guzari hai

KHudawanda

tujhe malum hai mere

har ek jaanib teri sau neamaten

bikhri hui thin

hazaron raste the

manzilen thin

raushni thi

rang the KHushbu thi

phulon se ladi shaKHen thin KHwahish ki

tamannaen labon par muskurahaT ke

kai naghme sajae raqs karti thin

kai jugnu meri shamon ke aangan se guzarte the

meri har aarzu ki apni peshani thi aur un se

kai suraj ubharte the

kai mahtab chehre

jhil si aankhen liye mere taaqub mein nikalte the

mujhe aawaz de kar

rokne ki koshishen karte na thakte the

kai dildar mausam the

ki jin mein titliyan barish ke rangon mein nahati

hath phailati

mare qurb-o-jawar dida-o-dil se guzarti thin

magar main ne

KHudawanda

tujhe malum hai main ne

teri sari inayat ko

teri un neamaton ko aankh bhar kar bhi nahin dekha

KHudawanda

tujhe malum hai

tu jaanta hai

ki mere dil aur meri aankhon mein bas wo

mausam-e-dil-dar basta tha

isi mausam ki chahat

aur mohabbat ka kahin

iqrar basta tha

isi mausam ko dil ne apni subh-sham jaana tha

agarche rah mein aaya hua sara zamana tha

KHudawanda tujhe malum hai

tu jaanta hai

dilon ke zaKHm

aur aankhon ki sari kaifiyat pahchanta hai

magar main ne

use jaanana pahchana

mujhe jo bhi kaha us ne

usi ko zindagi jaana

usi ko raushni jaana

KHudawanda

tujhe malum hai us ne

basar ki zindagi meri

chura li raushni meri

tujhe malum hai sab kuchh

KHudawanda tujhe malum hai sab kuchh

meri umr-e-guzishta ka

meri umr-e-rawan ka

ek ek lamha

usi be-faiz mausam ki rifaqat ke hi kaam aaya

magar ab main

KHudawanda

magar ab main mohabbat ke

usi be-faiz mausam ki rifaqat ke

azabon

aur KHwabon se

thaka-haara hua insan

rihai chahta hun

teri sau neamaten hain

un se tanhai ki neamat chahta hun

KHudawanda tujhe malum hai main ne

ye apni umr kas be-faiz mausam ki rifaqat mein guzari hai

yaqin-o-be-yaqini ki aziyyat mein guzari hai

KHudawanda

mujhe tanhai ki neamat ata kar de