be-kaifi

aaj kuchh aur rang taarī hai

har nafas zindagī pe bhārī hai

māh-o-anjum meñ raushnī na rahī

lāla-o-gul meñ tāzgī na rahī

yaanī duniyā meñ dilkashī na rahī

ham haiñ aur apnī ġham-gusārī hai

husn-o-ulfat kā vo fusūñ na rahā

dil hai dil ko magar junūñ na rahā

dil vahī dil ke vārdāt vahī

un kā ab bhī hai iltifāt vahī

mahl dīgar hai vāqi.āt vahī

lekin ab ruuh ko sukūñ na rahā

be-ruḳhī vajah-e-intiqām nahīñ

is shikāyat kā koī naam nahīñ

sargirānī hai aur dil maġhmūm

gum hai kaifiyyatoñ meñ har mafhūm

vajh-e-be-rabtī kuchh nahīñ ma.alūm

un se ab nāma-o-payām nahīñ

be-sabātī nahīñ uḌātī hai

aas bañdhtī hai TuuT jaatī hai

kyā tabī.at rahe javāñ āḳhir

har yaqīñ ban gayā gumāñ āḳhir

is fazā meñ sukūñ kahāñ āḳhir

lab pe ghabrā ke aah aatī hai

āḳhirī ye bhī ik gunāh kareñ

un se ham tark-e-rasm-o-rāh kareñ

dard hai zindagī mohabbat kī

intihā ye huī mohabbat kī

ibtidā ham ne kī mohabbat kī

vo bhalā kis liye nibāh kareñ

aaj kuchh aur rang tari hai

har nafas zindagi pe bhaari hai

mah-o-anjum mein raushni na rahi

lala-o-gul mein tazgi na rahi

yani duniya mein dilkashi na rahi

hum hain aur apni gham-gusari hai

husn-o-ulfat ka wo fusun na raha

dil hai dil ko magar junun na raha

dil wahi dil ke wardat wahi

un ka ab bhi hai iltifat wahi

mahl digar hai waqiat wahi

lekin ab ruh ko sukun na raha

be-ruKHi wajah-e-intiqam nahin

is shikayat ka koi nam nahin

sargirani hai aur dil maghmum

gum hai kaifiyyaton mein har mafhum

wajh-e-be-rabti kuchh nahin malum

un se ab nama-o-payam nahin

be-sabaati nahin uDati hai

aas bandhti hai TuT jati hai

kya tabiat rahe jawan aaKHir

har yaqin ban gaya guman aaKHir

is faza mein sukun kahan aaKHir

lab pe ghabra ke aah aati hai

aaKHiri ye bhi ek gunah karen

un se hum tark-e-rasm-o-rah karen

dard hai zindagi mohabbat ki

intiha ye hui mohabbat ki

ibtida hum ne ki mohabbat ki

wo bhala kis liye nibah karen