بے کیفی

آج کچھ اور رنگ طاری ہے

ہر نفس زندگی پہ بھاری ہے

ماہ و انجم میں روشنی نہ رہی

لالہ و گل میں تازگی نہ رہی

یعنی دنیا میں دل کشی نہ رہی

ہم ہیں اور اپنی غم گساری ہے

حسن و الفت کا وہ فسوں نہ رہا

دل ہے دل کو مگر جنوں نہ رہا

دل وہی دل کے واردات وہی

ان کا اب بھی ہے التفات وہی

محل دیگر ہے واقعات وہی

لیکن اب روح کو سکوں نہ رہا

بے رخی وجہ انتقام نہیں

اس شکایت کا کوئی نام نہیں

سرگرانی ہے اور دل مغموم

گم ہے کیفتیوں میں ہر مفہوم

وجہ بے ربطی کچھ نہیں معلوم

ان سے اب نامہ و پیام نہیں

بے ثباتی نہیں اڑاتی ہے

آس بندھتی ہے ٹوٹ جاتی ہے

کیا طبیعت رہے جواں آخر

ہر یقیں بن گیا گماں آخر

اس فضا میں سکوں کہاں آخر

لب پہ گھبرا کے آہ آتی ہے

آخری یہ بھی اک گناہ کریں

ان سے ہم ترک رسم و راہ کریں

درد ہے زندگی محبت کی

انتہا یہ ہوئی محبت کی

ابتدا ہم نے کی محبت کی

وہ بھلا کس لئے نباہ کریں