be-karan

sahar hote kiyā hai jab bhī āġhāz safar maiñ ne

to har ik moḌ par har raah par har ek bastī meñ

yahī pūchhā hai mujh se kaun huuñ kyā naam hai merā

mirī manzil kahāñ hai kaun sā shahr-e-tamannā hai

ki jis kī diid kā armāñ hai jis kā sar meñ saudā hai

savāloñ ko mire shauq-e-safar kī āgahī dene

nazar uThtī ḳhalā kī vus.atoñ meñ Duub kar kahtī

ufuq ke paar sūraj ke sunahrī baam se aage

zamīn-o-āsmāñ kī sarhadeñ jis jā pe miltī haiñ

mirā shahr-e-tamannā hai vahīñ tak mujh ko jaanā hai

ye duniyā mujh ko dīvāna samajh kar mujh pe hañstī hai

sahar hote kiya hai jab bhi aaghaz safar main ne

to har ek moD par har rah par har ek basti mein

yahi puchha hai mujh se kaun hun kya nam hai mera

meri manzil kahan hai kaun sa shahr-e-tamanna hai

ki jis ki did ka arman hai jis ka sar mein sauda hai

sawalon ko mere shauq-e-safar ki aagahi dene

nazar uThti KHala ki wusaton mein Dub kar kahti

ufuq ke par suraj ke sunahri baam se aage

zamin-o-asman ki sarhaden jis ja pe milti hain

mera shahr-e-tamanna hai wahin tak mujh ko jaana hai

ye duniya mujh ko diwana samajh kar mujh pe hansti hai