be-KHabari

ḳhauf abhī juḌā na thā silsila-e-kalām se

harf abhī bujhe na the dahshat-e-kam-ḳhirām se

sañg-e-malāl ke liye dil āstāñ huā na thā

iqlīm-e-ḳhvāb meñ kahīñ koī ziyāñ huā na thā

nik.hat-e-abr-o-bād kī mastī meñ Dolte the ghar

saaf dikhā.ī dete the

us kī galī ke sab shajar

gard misāl-e-dastkeñ dar pe abhī jamī na thiiñ

rañg-e-firāq-o-vasl kī parteñ abhī khulī na thiiñ

aise meñ thī kise ḳhabar

jab sā.at-e-māhtāb ho

yuuñ bhī to hai ki aur hī naqsha-e-ḳhāk-o-āb ho

KHauf abhi juDa na tha silsila-e-kalam se

harf abhi bujhe na the dahshat-e-kam-KHiram se

sang-e-malal ke liye dil aastan hua na tha

iqlim-e-KHwab mein kahin koi ziyan hua na tha

nikhat-e-abr-o-baad ki masti mein Dolte the ghar

saf dikhai dete the

us ki gali ke sab shajar

gard misal-e-dastken dar pe abhi jami na thin

rang-e-firaq-o-wasl ki parten abhi khuli na thin

aise mein thi kise KHabar

jab saat-e-mahtab ho

yun bhi to hai ki aur hi naqsha-e-KHak-o-ab ho