be-KHwab masafat

ek do pal to zarā aur ruko

aisī jaldī bhī bhalā kyā hai chale jaanā tum

shaam mahkī hai abhī aur na palkoñ pe sitāre jaage

ham sar-e-rāh achānak hī sahī

muddatoñ ba.ad mile haiñ to na milne kī shikāyat kaisī

fursateñ kis ko mayassar haiñ yahāñ

aao do-chār qadam aur zarā saath chaleñ

shahr-e-afsurda ke māthe pe bujhī shaam kī raakh

zard pattoñ meñ simaTtī dekheñ

phir usī ḳhāk-ba-dāmāñ pal se

apne guzre hue kal kī ḳhush-bū

lamha-e-hāl meñ shāmil kar ke

apnī be-ḳhvāb masāfat kā izāla kar leñ

apne hone kā yaqīñ

aur na hone kā tamāshā kar leñ

aaj kī shaam sitārā kar leñ

ek do pal to zara aur ruko

aisi jaldi bhi bhala kya hai chale jaana tum

sham mahki hai abhi aur na palkon pe sitare jage

hum sar-e-rah achanak hi sahi

muddaton baad mile hain to na milne ki shikayat kaisi

fursaten kis ko mayassar hain yahan

aao do-chaar qadam aur zara sath chalen

shahr-e-afsurda ke mathe pe bujhi sham ki rakh

zard patton mein simaTti dekhen

phir usi KHak-ba-daman pal se

apne guzre hue kal ki KHush-bu

lamha-e-haal mein shamil kar ke

apni be-KHwab masafat ka izala kar len

apne hone ka yaqin

aur na hone ka tamasha kar len

aaj ki sham sitara kar len