be-nam

mire ḳhayāl tirī rahbarī javān rahe

tire tufail mire dil ko kuchh sukūñ to milā

maiñ kyā huuñ is kī ḳhabar kuchh mujhe hai aur na tujhe

magar kahāñ huuñ tujhe is kā ilm ho shāyad

mujhe bas itnā batā de hai kaun sā ye dayār

mirī nigāh kī rag rag meñ hai pareshānī

tasavvurāt ke ḳhāmosh se dhuñdalkoñ meñ

nuqūsh bante haiñ miTte haiñ aur maiñ hairāñ huuñ

dil-e-hazīñ pe kisī aah kā nuzūl nahīñ

ki mere lab to fuġhāñ kī adā bhī bhuul ga.e

kahāñ ga.e vo javāñ ārzūoñ ke maqtal

mirī nigāh ke āvāra qāsido āḳhir

kahāñ ga.e vo mirī hasratoñ ke suune mazār

kahāñ ke ashk kahāñ kā alam kahāñ kī fuġhāñ

yahāñ ajiib sī taskīn dil ko miltī hai

sukūt hai ki har ik rag ko de rahā hai sukūñ

agar fusūñ hai to kitnā hasīn hai ye fusūñ

ye ḳhvāb hai to ye merā nasīb ho jaa.e

tamām umr agar us kī aarzū bhī kare

mujhe yaqīñ hai koī phir bhī kāmyāb na ho

mire ḳhayāl yahāñ aa gayā huuñ maiñ kaise

mujhe bas itnā batā de hai kaun sā ye dayār

mere KHayal teri rahbari jawan rahe

tere tufail mere dil ko kuchh sukun to mila

main kya hun is ki KHabar kuchh mujhe hai aur na tujhe

magar kahan hun tujhe is ka ilm ho shayad

mujhe bas itna bata de hai kaun sa ye dayar

meri nigah ki rag rag mein hai pareshani

tasawwuraat ke KHamosh se dhundalkon mein

nuqush bante hain miTte hain aur main hairan hun

dil-e-hazin pe kisi aah ka nuzul nahin

ki mere lab to fughan ki ada bhi bhul gae

kahan gae wo jawan aarzuon ke maqtal

meri nigah ke aawara qasido aaKHir

kahan gae wo meri hasraton ke sune mazar

kahan ke ashk kahan ka alam kahan ki fughan

yahan ajib si taskin dil ko milti hai

sukut hai ki har ek rag ko de raha hai sukun

agar fusun hai to kitna hasin hai ye fusun

ye KHwab hai to ye mera nasib ho jae

tamam umr agar us ki aarzu bhi kare

mujhe yaqin hai koi phir bhi kaamyab na ho

mere KHayal yahan aa gaya hun main kaise

mujhe bas itna bata de hai kaun sa ye dayar