be-nam nazmen

aḳhbār ke bikhre hue pannoñ meñ

yā shāyad

whatsapp ke kisī group meñ kahīñ

us ne paḌhī thiiñ

kuchh dard meñ Duubī ġham-e-hijrāñ se mo.attar

mānūs se alfāz meñ pahchānī sī satreñ

be-nām sī nazmeñ

jin meñ kahīñ shā.ir kā koī naam nahīñ thā

mumkin hai ki in nazmoñ se

kuchh uns shanāsā.ī yā shāyad koī rishta

use mahsūs huā ho

shāyad use yaad aaya ho ik rabt purānā

un bikhrī huī nazmoñ sā

mumkin hai ki

vo rabt bhī us ke liye be-nām rahā ho

jo bhī ho

magar us ne vo nazmeñ mujhe bhejīñ

alfāz kifāyat se barat.te hue pūchhā

lahja to tumhārā hai ye tum ne hī likhī haiñ

maiñ der se bas soch rahā huuñ use pūchhūñ

vāqif ho mire ġham se mirī aahoñ se ab bhī

ehsās abhī tak hai mire dard kā tum ko

alfāz baratne kā salīqa nahīñ bhūlī

taaza hai abhī zehn meñ nazmoñ kā bhī lahja

tum itnā samajhtī ho mujhe phir ye batāo

ham paas rahe itne to ab fāsla kyoñ hai

aKHbar ke bikhre hue pannon mein

ya shayad

whatsapp ke kisi group mein kahin

us ne paDhi thin

kuchh dard mein Dubi gham-e-hijran se moattar

manus se alfaz mein pahchani si satren

be-nam si nazmen

jin mein kahin shair ka koi nam nahin tha

mumkin hai ki in nazmon se

kuchh uns shanasai ya shayad koi rishta

use mahsus hua ho

shayad use yaad aaya ho ek rabt purana

un bikhri hui nazmon sa

mumkin hai ki

wo rabt bhi us ke liye be-nam raha ho

jo bhi ho

magar us ne wo nazmen mujhe bhejin

alfaz kifayat se baratte hue puchha

lahja to tumhaara hai ye tum ne hi likhi hain

main der se bas soch raha hun use puchhun

waqif ho mere gham se meri aahon se ab bhi

ehsas abhi tak hai mere dard ka tum ko

alfaz baratne ka saliqa nahin bhuli

taza hai abhi zehn mein nazmon ka bhi lahja

tum itna samajhti ho mujhe phir ye batao

hum pas rahe itne to ab fasla kyon hai