be-rahm shaeron ke jurm

tumheñ puurā haq hai

nārāz hone kā

ham be-rahm shā.eroñ se

ham ne tumheñ ik tamāshā banā diyā

tumhāre dil meñ dafn

gahre-tarīn rāzoñ tak

hamārī nazar pahuñch ga.ī

aur ham ne tumheñ sharminda kar diyā

duniyā ke sāmne

tumhāre rāzoñ par nazmeñ likh kar

tum hamāre jurm par

hameñ hathkaḌī na lagvā sake

hameñ adālat na le jā sake

na phāñsī par chaḌvā sake

tum hamāre ḳhuun se

apne haath rañgne ke liye bhī

ḳhud ko āmāda na kar sake

go ye kuchh aisā mushkil bhī na thā

lekin hameñ andāza hai

tum ham se badla lene kī tāqat rakhte ho

aur irāda bhī

is be-rahm duniyā ko chhoḌ dene ke bāvajūd!

tumhein pura haq hai

naraaz hone ka

hum be-rahm shaeron se

hum ne tumhein ek tamasha bana diya

tumhaare dil mein dafn

gahre-tarin raazon tak

hamari nazar pahunch gai

aur hum ne tumhein sharminda kar diya

duniya ke samne

tumhaare raazon par nazmen likh kar

tum hamare jurm par

hamein hathkaDi na lagwa sake

hamein adalat na le ja sake

na phansi par chaDwa sake

tum hamare KHun se

apne hath rangne ke liye bhi

KHud ko aamada na kar sake

go ye kuchh aisa mushkil bhi na tha

lekin hamein andaza hai

tum hum se badla lene ki taqat rakhte ho

aur irada bhi

is be-rahm duniya ko chhoD dene ke bawajud!