bedar hona chahiye

nau-javāno ab hameñ bedār honā chāhiye

desh-sevā ke liye tayyār honā chāhiye

jo bahādur haiñ unheñ chhatrī kī hājat hī nahīñ

un ke sar pe sāya-e-talvār honā chāhiye

bistar-e-rāhat se uTh kar ab vatan ke vāste

har musībat se hameñ do-chār honā chāhiye

dil meñ soz-e-qaum ho siine meñ dard-e-hurriyat

aañkh ko bahr-e-vatan ḳhūñ-bār honā chāhiye

āshnā-e-dard ho pahlū kaleja dāġh-dār

aur jigar ko tishna-e-āzār honā chāhiye

muddatoñ se hai gulistān-e-vatan ujḌā huā

ye hamāre ḳhuuñ se lāla-zār honā chāhiye

ġhairat-e-qaumī se aa jaa.e hamiyyat josh meñ

har rag-e-ḳhūñ ek mahshar-zār honā chāhiye

desh-o-jātī kā hameñ ġham-ḳhvār honā chāhiye

mādar-e-bhārat se ham ko pyaar honā chāhiye

mushta.il ho jaa.e jab siine meñ āzādī kī aag

har-nafas ko āh-e-ātish-bār honā chāhiye

yā to āzādī se 'sābir' ho hamārā sar buland

yā hamāre sar ko zeb-e-dār honā chāhiye

nau-jawano ab hamein bedar hona chahiye

desh-sewa ke liye tayyar hona chahiye

jo bahadur hain unhen chhatri ki hajat hi nahin

un ke sar pe saya-e-talwar hona chahiye

bistar-e-rahat se uTh kar ab watan ke waste

har musibat se hamein do-chaar hona chahiye

dil mein soz-e-qaum ho sine mein dard-e-hurriyat

aankh ko bahr-e-watan KHun-bar hona chahiye

aashna-e-dard ho pahlu kaleja dagh-dar

aur jigar ko tishna-e-azar hona chahiye

muddaton se hai gulistan-e-watan ujDa hua

ye hamare KHun se lala-zar hona chahiye

ghairat-e-qaumi se aa jae hamiyyat josh mein

har rag-e-KHun ek mahshar-zar hona chahiye

desh-o-jati ka hamein gham-KHwar hona chahiye

madar-e-bhaarat se hum ko pyar hona chahiye

mushtail ho jae jab sine mein aazadi ki aag

har-nafas ko aah-e-atish-bar hona chahiye

ya to aazadi se 'sabir' ho hamara sar buland

ya hamare sar ko zeb-e-dar hona chahiye