bedari

niiñd kamre meñ Tahal rahī hai

raat kī be-shumār āñkheñ mujh par gaḌīñ haiñ

maiñ be-sudh ek kone meñ paḌī huuñ

raat kī gahrī siyāhī mujh par musallat hone lagī hai

merī adh-khulī khiḌkī se aane vaalī

niilī chāñdnī

dil se dīvānoñ kī tarah lipaT rahī hai

aise meñ

ek ġhair mub.ham vahshat mujh par taarī hotī hai

tanhā.ī chīḳh chīḳh kar

māhaul ko mazīd vahshat-zada banā rahī hai

ird-gird kī har shai par

kapkapāhaT taarī hai

ya.anī dard jaarī hai

ye tārīkī ruuh kī bedārī hai

nind kamre mein Tahal rahi hai

raat ki be-shumar aankhen mujh par gaDin hain

main be-sudh ek kone mein paDi hun

raat ki gahri siyahi mujh par musallat hone lagi hai

meri adh-khuli khiDki se aane wali

nili chandni

dil se diwanon ki tarah lipaT rahi hai

aise mein

ek ghair mubham wahshat mujh par tari hoti hai

tanhai chiKH chiKH kar

mahaul ko mazid wahshat-zada bana rahi hai

ird-gird ki har shai par

kapkapahaT tari hai

yani dard jari hai

ye tariki ruh ki bedari hai