bedari

ye sannāTā ye tārīkī kā aalam

koī hamrāz na koī hai hamdam

kahāñ hai rañg kī bū kī vo duniyā

kahāñ haiñ gul kahāñ naġhmoñ kī sargam

ilāhī kyā yahī hai terā barzaḳh

nahīñ nafs o jism jis jā pe bāham

sabr kar tū zarā be-tābī-e-dil

abhī tak hai tabī.at kā ye aalam

abhī taa.ir nafas kā qaid meñ hai

abhī to haiñ hayūlā ke pas-e-vahm

tere sāñsoñ kī gintī bhī hai baaqī

nahīñ aayā abhī rehlat kā mausam

basīrat aur tasavvur auj par hai

dīgar ehsās haiñ ḳhāmosh-o-barham

nahīñ tasvīr-e-hastī sāmne to kyā

taḳhayyul hai terā sābit musallam

banā phir se jahān-e-rañg-o-bū ko

chaman āñkhoñ se ojhal hai to kyā ġham

tirā nazzāra lekin rā.egāñ hai

tū dekhe aur na dekhe koī hamdam

agar imkān ho to naqsh kar tū

tere jazbāt kī halchal talātum

tere afkār ko alfāz meñ Dhaal

banā un se ek tasvīr-e-mujassam

terī taḳhlīq aisī bā-asar ho

nazar aa.e guloñ kā rañg kaliyoñ kā tabassum

atā sauġhāt ho zor-e-qalam kī

duā terī 'anīs' aisī ho har dam

ye sannaTa ye tariki ka aalam

koi hamraaz na koi hai hamdam

kahan hai rang ki bu ki wo duniya

kahan hain gul kahan naghmon ki sargam

ilahi kya yahi hai tera barzaKH

nahin nafs o jism jis ja pe baham

sabr kar tu zara be-tabi-e-dil

abhi tak hai tabiat ka ye aalam

abhi tair nafas ka qaid mein hai

abhi to hain hayula ke pas-e-wahm

tere sanson ki ginti bhi hai baqi

nahin aaya abhi rehlat ka mausam

basirat aur tasawwur auj par hai

digar ehsas hain KHamosh-o-barham

nahin taswir-e-hasti samne to kya

taKHayyul hai tera sabit musallam

bana phir se jahan-e-rang-o-bu ko

chaman aankhon se ojhal hai to kya gham

tera nazzara lekin raegan hai

tu dekhe aur na dekhe koi hamdam

agar imkan ho to naqsh kar tu

tere jazbaat ki halchal talatum

tere afkar ko alfaz mein Dhaal

bana un se ek taswir-e-mujassam

teri taKHliq aisi ba-asar ho

nazar aae gulon ka rang kaliyon ka tabassum

ata saughat ho zor-e-qalam ki

dua teri 'anis' aisi ho har dam