waqt

ye vaqt kyā hai

ye kyā hai āḳhir ki jo musalsal guzar rahā hai

ye jab na guzrā thā

tab kahāñ thā

kahīñ to hogā

guzar gayā hai

to ab kahāñ hai

kahīñ to hogā

kahāñ se aayā kidhar gayā hai

ye kab se kab tak kā silsila hai

ye vaqt kyā hai

ye vāqiye

hādse

tasādum

har ek ġham

aur har ik masarrat

har ik aziyyat

har ek lazzat

har ik tabassum

har ek aañsū

har ek naġhma

har ek ḳhushbū

vo zaḳhm kā dard ho

ki vo lams kā ho jaadū

ḳhud apnī āvāz ho ki māhaul kī sadā.eñ

ye zehn meñ bantī aur bigaḌtī huī fazā.eñ

vo fikr meñ aa.e zalzale hoñ ki dil kī halchal

tamām ehsās

saare jazbe

ye jaise patte haiñ

bahte paanī kī sat.h par

jaise tairte haiñ

abhī yahāñ haiñ

abhī vahāñ haiñ

aur ab haiñ ojhal

dikhā.ī detā nahīñ hai lekin

ye kuchh to hai

jo ki bah rahā hai

ye kaisā dariyā hai

kin pahāḌoñ se aa rahā hai

ye kis samundar ko jā rahā hai

ye vaqt kyā hai

kabhī kabhī maiñ ye sochtā huuñ

ki chaltī gaaḌī se peḌ dekho

to aisā lagtā hai

dūsrī samt jā rahe haiñ

magar haqīqat meñ

peḌ apnī jagah khaḌe haiñ

to kyā ye mumkin hai

saarī sadiyāñ

qatār-andar-qatār apnī jagah khaḌī hoñ

ye vaqt sākit ho

aur ham hī guzar rahe hoñ

is ek lamhe meñ

saare lamhe

tamām sadiyāñ chhupī huī hoñ

na koī ā.inda

na guzishta

jo ho chukā hai

jo ho rahā hai

jo hone vaalā hai

ho rahā hai

maiñ sochtā huuñ

ki kyā ye mumkin hai

sach ye ho

ki safar meñ ham haiñ

guzarte ham haiñ

jise samajhte haiñ ham

guzartā hai

vo thamā hai

guzartā hai yā thamā huā hai

ikaa.ī hai yā baTā huā hai

hai munjamid

yā pighal rahā hai

kise ḳhabar hai

kise patā hai

ye vaqt kyā hai

ye kā.enāt-e-azīm

lagtā hai

apnī azmat se

aaj bhī mutma.in nahīñ hai

ki lamha lamha

vasī.a-tar aur vasī.a-tar hotī jā rahī hai

ye apnī bāñheñ pasārtī hai

ye kahkashāoñ kī uñgliyoñ se

na.e ḳhalāoñ ko chhū rahī hai

agar ye sach hai

to har tasavvur kī had se bāhar

magar kahīñ par

yaqīnan aisā koī ḳhalā hai

ki jis ko

in kahkashāoñ kī uñgliyoñ ne

ab tak chhuā nahīñ hai

ḳhalā

jahāñ kuchh huā nahīñ hai

ḳhalā

ki jis ne kisī se bhī ''kun'' sunā nahīñ hai

jahāñ abhī tak ḳhudā nahīñ hai

vahāñ

koī vaqt bhī na hogā

ye kā.enāt-e-azīm

ik din

chhuegī

is an-chhue ḳhalā ko

aur apne saare vajūd se

jab pukāregī

''kun''

to vaqt ko bhī janam milegā

agar janam hai to maut bhī hai

maiñ sochtā huuñ

ye sach nahīñ hai

ki vaqt kī koī ibtidā hai na intihā hai

ye Dor lambī bahut hai

lekin

kahīñ to is Dor kā sirā hai

abhī ye insāñ ulajh rahā hai

ki vaqt ke is qafas meñ

paidā huā

yahīñ vo palā-baḌhā hai

magar use ilm ho gayā hai

ki vaqt ke is qafas se bāhar bhī ik fazā hai

to sochtā hai

vo pūchhtā hai

ye vaqt kyā hai

ye waqt kya hai

ye kya hai aaKHir ki jo musalsal guzar raha hai

ye jab na guzra tha

tab kahan tha

kahin to hoga

guzar gaya hai

to ab kahan hai

kahin to hoga

kahan se aaya kidhar gaya hai

ye kab se kab tak ka silsila hai

ye waqt kya hai

ye waqiye

hadse

tasadum

har ek gham

aur har ek masarrat

har ek aziyyat

har ek lazzat

har ek tabassum

har ek aansu

har ek naghma

har ek KHushbu

wo zaKHm ka dard ho

ki wo lams ka ho jadu

KHud apni aawaz ho ki mahaul ki sadaen

ye zehn mein banti aur bigaDti hui fazaen

wo fikr mein aae zalzale hon ki dil ki halchal

tamam ehsas

sare jazbe

ye jaise patte hain

bahte pani ki sath par

jaise tairte hain

abhi yahan hain

abhi wahan hain

aur ab hain ojhal

dikhai deta nahin hai lekin

ye kuchh to hai

jo ki bah raha hai

ye kaisa dariya hai

kin pahaDon se aa raha hai

ye kis samundar ko ja raha hai

ye waqt kya hai

kabhi kabhi main ye sochta hun

ki chalti gaDi se peD dekho

to aisa lagta hai

dusri samt ja rahe hain

magar haqiqat mein

peD apni jagah khaDe hain

to kya ye mumkin hai

sari sadiyan

qatar-andar-qatar apni jagah khaDi hon

ye waqt sakit ho

aur hum hi guzar rahe hon

is ek lamhe mein

sare lamhe

tamam sadiyan chhupi hui hon

na koi aainda

na guzishta

jo ho chuka hai

jo ho raha hai

jo hone wala hai

ho raha hai

main sochta hun

ki kya ye mumkin hai

sach ye ho

ki safar mein hum hain

guzarte hum hain

jise samajhte hain hum

guzarta hai

wo thama hai

guzarta hai ya thama hua hai

ikai hai ya baTa hua hai

hai munjamid

ya pighal raha hai

kise KHabar hai

kise pata hai

ye waqt kya hai

ye kaenat-e-azim

lagta hai

apni azmat se

aaj bhi mutmain nahin hai

ki lamha lamha

wasia-tar aur wasia-tar hoti ja rahi hai

ye apni banhen pasarti hai

ye kahkashaon ki ungliyon se

nae KHalaon ko chhu rahi hai

agar ye sach hai

to har tasawwur ki had se bahar

magar kahin par

yaqinan aisa koi KHala hai

ki jis ko

in kahkashaon ki ungliyon ne

ab tak chhua nahin hai

KHala

jahan kuchh hua nahin hai

KHala

ki jis ne kisi se bhi kun suna nahin hai

jahan abhi tak KHuda nahin hai

wahan

koi waqt bhi na hoga

ye kaenat-e-azim

ek din

chhuegi

is an-chhue KHala ko

aur apne sare wajud se

jab pukaregi

kun

to waqt ko bhi janam milega

agar janam hai to maut bhi hai

main sochta hun

ye sach nahin hai

ki waqt ki koi ibtida hai na intiha hai

ye Dor lambi bahut hai

lekin

kahin to is Dor ka sira hai

abhi ye insan ulajh raha hai

ki waqt ke is qafas mein

paida hua

yahin wo pala-baDha hai

magar use ilm ho gaya hai

ki waqt ke is qafas se bahar bhi ek faza hai

to sochta hai

wo puchhta hai

ye waqt kya hai