bele ke phul

dekhiye aa ke zarā bele ke phūloñ kī bahār

jam ga.e shāḳh pe ye duudh ke qatre kaise

marmarīñ phuul zamurrad ke hasīñ DanThal par

Daal par baiTh ga.e aa ke ye bagule kaise

chāñdnī raat meñ bele ke shagufta ye phuul

aa ga.e kunj meñ jannat ke nazāre kyūñ-kar

in hasīñ phūloñ meñ shabnam ke chamakte motī

sang-e-marmar pe utar aa.e sitāre kyūñkar

kuchh hī gul-barg jo uupar ko uThā.e haiñ sar

kuchh jhukī jaatī haiñ nīche kī taraf pankhuḌiyāñ

vo jamā.e hue haiñ husn-e-surayyā pe nigāh

un kī nazroñ meñ haiñ pātāl kī nāzuk pariyāñ

mujh ko hotā hai gumāñ dast-e-sulaimānī ne

qaaf par sotī huī pariyoñ ke par khol diye

bār-bār aatā hai aisā bhī mire dil meñ ḳhayāl

jaise rizvāñ ne hasīñ ḳhuld ke dar khol diye

jazba-e-ishq bhī maujūd hai in phūloñ meñ

nasha-e-shauq se har vaqt ye lahrāte haiñ

chuum lete haiñ kabhī dast-e-hinā.ī ko ye gul

kabhī mahbūb ke juuḌe se lipaT jaate haiñ

asl meñ zindagī-o-maut ke sāthī haiñ ye phuul

kyoñ na phir ham kareñ jī-bhar ke mohabbat in se

kabhī ban jaate haiñ ma.ashūq ke sehre kī laḌī

kabhī āshiq kī mahak uThtī hai turbat in se

dekhiye aa ke zara bele ke phulon ki bahaar

jam gae shaKH pe ye dudh ke qatre kaise

marmarin phul zamurrad ke hasin DanThal par

Dal par baiTh gae aa ke ye bagule kaise

chandni raat mein bele ke shagufta ye phul

aa gae kunj mein jannat ke nazare kyun-kar

in hasin phulon mein shabnam ke chamakte moti

sang-e-marmar pe utar aae sitare kyunkar

kuchh hi gul-barg jo upar ko uThae hain sar

kuchh jhuki jati hain niche ki taraf pankhuDiyan

wo jamae hue hain husn-e-surayya pe nigah

un ki nazron mein hain patal ki nazuk pariyan

mujh ko hota hai guman dast-e-sulaimani ne

qaf par soti hui pariyon ke par khol diye

bar-bar aata hai aisa bhi mere dil mein KHayal

jaise rizwan ne hasin KHuld ke dar khol diye

jazba-e-ishq bhi maujud hai in phulon mein

nasha-e-shauq se har waqt ye lahraate hain

chum lete hain kabhi dast-e-hinai ko ye gul

kabhi mahbub ke juDe se lipaT jate hain

asl mein zindagi-o-maut ke sathi hain ye phul

kyon na phir hum karen ji-bhar ke mohabbat in se

kabhi ban jate hain mashuq ke sehre ki laDi

kabhi aashiq ki mahak uThti hai turbat in se