بیلے کے پھول

دیکھیے آ کے ذرا بیلے کے پھولوں کی بہار

جم گئے شاخ پہ یہ دودھ کے قطرے کیسے

مرمریں پھول زمرد کے حسیں ڈنٹھل پر

ڈال پر بیٹھ گئے آ کے یہ بگلے کیسے

چاندنی رات میں بیلے کے شگفتہ یہ پھول

آ گئے کنج میں جنت کے نظارے کیوں کر

ان حسیں پھولوں میں شبنم کے چمکتے موتی

سنگ مرمر پہ اتر آئے ستارے کیوں کر

کچھ ہی گل برگ جو اوپر کو اٹھائے ہیں سر

کچھ جھکی جاتی ہیں نیچے کی طرف پنکھڑیاں

وہ جمائے ہوئے ہیں حسن ثریا پہ نگاہ

ان کی نظروں میں ہیں پاتال کی نازک پریاں

مجھ کو ہوتا ہے گماں دست سلیمانی نے

قاف پر سوتی ہوئی پریوں کے پر کھول دئے

بار بار آتا ہے ایسا بھی مرے دل میں خیال

جیسے رضواں نے حسیں خلد کے در کھول دئے

جذبۂ عشق بھی موجود ہے ان پھولوں میں

نشۂ شوق سے ہر وقت یہ لہراتے ہیں

چوم لیتے ہیں کبھی دست حنائی کو یہ گل

کبھی محبوب کے جوڑے سے لپٹ جاتے ہیں

اصل میں زندگی و موت کے ساتھی ہیں یہ پھول

کیوں نہ پھر ہم کریں جی بھر کے محبت ان سے

کبھی بن جاتے ہیں معشوق کے سہرے کی لڑی

کبھی عاشق کی مہک اٹھتی ہے تربت ان سے