بیلاڈونا

اسی جگہ سے دھندلایا ہے ہر آئینہ

جہاں جہاں پر عکس ٹھٹھک کر ٹھہر گیا ہے

ایک دراڑ سی اگ آئی ہے

اس کے پیچھے پھیلتا سورج

سہم کے شبنم کی نرمی میں رستہ ڈھونڈنے نکل پڑا ہے

پلکوں پر سے قطرہ قطرہ بہتا ساگر

کھنچتے کھنچتے پورے فلک پر پھیل گیا ہے

اور سمٹ کر کئی لکیریں بہہ نکلی ہیں

ایسے جیسے شہر کی گلیاں

رسی کے بل کھاتے ٹکڑے

ایک عظیم مسافت کے سیلاب میں پل پل ڈوب رہے ہیں

دست فلک سے کٹ کر گرتے سب خوابوں کا

عکس رکا ہے

آئینے میں آدھے سوئے سوئے ستارے

نیند کے گہرے گڑھے میں اترے جاتے ہیں

جو پتھرائی آنکھ میں جم کر بھی پانی سے بھرا ہوا ہے