masjid

duur bargad kī ghanī chhāñv meñ ḳhāmosh o malūl

jis jagah raat ke tārīk kafan ke nīche

maazī o haal gunahgār namāzī kī tarah

apne āmāl pe ro lete haiñ chupke chupke

ek vīrān sī masjid kā shikasta sā kalas

paas bahtī huī naddī ko takā kartā hai

aur TuuTī huī dīvār pe chanDol kabhī

giit phīkā sā koī chheḌ diyā kartā hai

gard-ālūd charāġhoñ ko havā ke jhoñke

roz miTTī kī na.ī tah meñ dabā jaate haiñ

aur jaate hue sūraj ke vidā.ī anfās

raushnī aa ke darīchoñ kī bujhā jaate haiñ

hasrat-e-shām-o-sahar baiTh ke gumbad ke qarīb

in pareshān duāoñ ko sunā kartī hai

jo tarastī hī rahīñ rañg-e-asar kī ḳhātir

aur TuuTā huā dil thaam liyā kartī hai

yā abābīl koī āmad-e-sarmā ke qarīb

us ko maskan ke liye DhūñD liyā kartī hai

aur mehrāb-e-shikasta meñ simaT kar pahroñ

dāstāñ sard mumālik kī kahā kartī hai

ek būḌhā gadhā dīvār ke saa.e meñ kabhī

uuñgh letā hai zarā baiTh ke jaate jaate

yā musāfir koī aa jaatā hai vo bhī Dar kar

ek lamhe ko Thahar jaatā hai aate aate

farsh jārob-kashī kyā hai samajhtā hī nahīñ

kal-adam ho gayā tasbīh ke dānoñ kā nizām

taaq meñ sham.a ke aañsū haiñ abhī tak baaqī

ab musallā hai na mimbar na muazzin na imaam

aa chuke sāhab-e-aflāk ke paiġhām o salām

koh o dar ab na suneñge vo sadā-e-jibraīl

ab kisī kaabe kī shāyad na paḌegī buniyād

kho ga.ī dasht-e-farāmoshī meñ āvāz-e-ḳhalīl

chāñd phīkī sī hañsī hañs ke guzar jaatā hai

Daal dete haiñ sitāre dhulī chādar apnī

is nigār-e-dil-e-yazdāñ ke janāze pe bas ik

chashm nam kartī hai shabnam yahāñ aksar apnī

ek mailā sā akelā sā fasurda sā diyā

roz rāsha-zada hāthoñ se kahā kartā hai

tum jalāte ho kabhī aa ke bujhāte bhī nahīñ

ek jaltā hai magar ek bujhā kartā hai

tez naddī kī har ik mauj talātum-bar-dosh

chīḳh uThtī hai vahīñ duur se faanī faanī

kal bahā lūñgī tujhe toḌ ke sāhil kī quyūd

aur phir gumbad o mīnār bhī paanī paanī

dur bargad ki ghani chhanw mein KHamosh o malul

jis jagah raat ke tarik kafan ke niche

mazi o haal gunahgar namazi ki tarah

apne aamal pe ro lete hain chupke chupke

ek viran si masjid ka shikasta sa kalas

pas bahti hui naddi ko taka karta hai

aur TuTi hui diwar pe chanDol kabhi

git phika sa koi chheD diya karta hai

gard-alud charaghon ko hawa ke jhonke

roz miTTi ki nai tah mein daba jate hain

aur jate hue suraj ke widai anfas

raushni aa ke darichon ki bujha jate hain

hasrat-e-sham-o-sahar baiTh ke gumbad ke qarib

in pareshan duaon ko suna karti hai

jo tarasti hi rahin rang-e-asar ki KHatir

aur TuTa hua dil tham liya karti hai

ya ababil koi aamad-e-sarma ke qarib

us ko maskan ke liye DhunD liya karti hai

aur mehrab-e-shikasta mein simaT kar pahron

dastan sard mumalik ki kaha karti hai

ek buDha gadha diwar ke sae mein kabhi

ungh leta hai zara baiTh ke jate jate

ya musafir koi aa jata hai wo bhi Dar kar

ek lamhe ko Thahar jata hai aate aate

farsh jarob-kashi kya hai samajhta hi nahin

kal-adam ho gaya tasbih ke danon ka nizam

taq mein shama ke aansu hain abhi tak baqi

ab musalla hai na mimbar na muazzin na imam

aa chuke sahab-e-aflak ke paigham o salam

koh o dar ab na sunenge wo sada-e-jibrail

ab kisi kabe ki shayad na paDegi buniyaad

kho gai dasht-e-faramoshi mein aawaz-e-KHalil

chand phiki si hansi hans ke guzar jata hai

Dal dete hain sitare dhuli chadar apni

is nigar-e-dil-e-yazdan ke janaze pe bas ek

chashm nam karti hai shabnam yahan aksar apni

ek maila sa akela sa fasurda sa diya

roz rasha-zada hathon se kaha karta hai

tum jalate ho kabhi aa ke bujhate bhi nahin

ek jalta hai magar ek bujha karta hai

tez naddi ki har ek mauj talatum-bar-dosh

chiKH uThti hai wahin dur se fani fani

kal baha lungi tujhe toD ke sahil ki quyud

aur phir gumbad o minar bhi pani pani