bewa aur barsat

chhā.ī huī hai tīrgī us pe ye muñh kī hai jhaḌī

raat kaTegī kis tarah hashr-numā hai har ghaḌī

dekhtī hai sū-e-falak haa.e taras taras ke aañkh

aur mujhe Dubo.egī aaj baras baras ke aañkh

girya-e-be-asar mirā apnā asar dikhā.e kyā

dil kī lagī bujhā.e kyā dil kī lagī bujhā.e kyā

aaj ye abr kī garaj ḳhuub rulā.egī mujhe

lūñgī hazār karvaTeñ niiñd na aa.egī mujhe

siine meñ dil kabāb hai mujh se ho sabr kis tarah

ek balā shabāb hai mujh se ho jabr kis tarah

kauñd rahī haiñ bijliyāñ abr kā zor-shor hai

maiñ huuñ ki be-qarār huuñ tum ho ki ḳhvāb-e-gor hai

maiñ ne sahe haiñ dukh pe dukh umr kaTegī yaas meñ

tab.a ko intishār hai aur ḳhalal havās meñ

zabt kahāñ se lā.ūñ maiñ sard havā ko dekh kar

jaan pe hai banī huī shab kī fazā ko dekh kar

barq kī teġh hai sitam siina figār kyoñ na ho

zaḳhm-e-jigar hare hue yād-e-bahār kyoñ na ho

raat kī baat yaad hai raat kā pyaar yaad hai

nīñd-bharī vo chashm-e-mast us kā ḳhumār yaad hai

hai ye janāza-e-shabāb yā ki mirā palañg hai

aah tumheñ ḳhabar nahīñ jaan se koī tañg hai

kyā hī vo ḳhush-nasīb haiñ raaj hai aur suhāg hai

motiyoñ se bharī hai maañg rañg hai aur raag hai

kyā hī vo ḳhush-nasīb haiñ jin ke liye siñgār hai

aah mirā shabāb-e-husn rañj se ham-kanār hai

kuuk rahī haiñ koyaleñ jhuum rahī haiñ Dāliyāñ

paapī papīhā is taraf bol rahā hai pī kahāñ

pī hai kahāñ batā.ūñ kyā qissa-e-ġham sunā.ūñ kyā

maut bhī rāhbar nahīñ pī kā surāġh pā.ūñ kyā

uf ye kaleje kī dhaḌak haa.e ye āh-o-zāriyāñ

ḳhalq hai mīThī niiñd meñ mujh ko haiñ be-qarāriyāñ

josh hai pā.emāl-e-ġham past haiñ jī ke hausle

rasm-o-rivāj kā asar miT rahā hai valvale

chhai hui hai tirgi us pe ye munh ki hai jhaDi

raat kaTegi kis tarah hashr-numa hai har ghaDi

dekhti hai su-e-falak hae taras taras ke aankh

aur mujhe Duboegi aaj baras baras ke aankh

girya-e-be-asar mera apna asar dikhae kya

dil ki lagi bujhae kya dil ki lagi bujhae kya

aaj ye abr ki garaj KHub rulaegi mujhe

lungi hazar karwaTen nind na aaegi mujhe

sine mein dil kabab hai mujh se ho sabr kis tarah

ek bala shabab hai mujh se ho jabr kis tarah

kaund rahi hain bijliyan abr ka zor-shor hai

main hun ki be-qarar hun tum ho ki KHwab-e-gor hai

main ne sahe hain dukh pe dukh umr kaTegi yas mein

taba ko intishaar hai aur KHalal hawas mein

zabt kahan se laun main sard hawa ko dekh kar

jaan pe hai bani hui shab ki faza ko dekh kar

barq ki tegh hai sitam sina figar kyon na ho

zaKHm-e-jigar hare hue yaad-e-bahaar kyon na ho

raat ki baat yaad hai raat ka pyar yaad hai

nind-bhari wo chashm-e-mast us ka KHumar yaad hai

hai ye janaza-e-shabab ya ki mera palang hai

aah tumhein KHabar nahin jaan se koi tang hai

kya hi wo KHush-nasib hain raj hai aur suhag hai

motiyon se bhari hai mang rang hai aur rag hai

kya hi wo KHush-nasib hain jin ke liye singar hai

aah mera shabab-e-husn ranj se ham-kanar hai

kuk rahi hain koyalen jhum rahi hain Daliyan

papi papiha is taraf bol raha hai pi kahan

pi hai kahan bataun kya qissa-e-gham sunaun kya

maut bhi rahbar nahin pi ka suragh paun kya

uf ye kaleje ki dhaDak hae ye aah-o-zariyan

KHalq hai miThi nind mein mujh ko hain be-qarariyan

josh hai paemal-e-gham past hain ji ke hausle

rasm-o-riwaj ka asar miT raha hai walwale