bewa ki fariyaad

kisī kī yaad dil meñ hai ki jis se jī niDhāl hai

kahūñ agar to kyā kahūñ ajab tarah kā haal hai

na vo zamīñ na vo falak na ab vo kā.enāt hai

vo zindagī hī ab nahīñ na din hai vo na raat hai

vo aarzū hai kaun sī jo aaj pā-ba-gil nahīñ

hai naam dil kā dil magar jo sach kahūñ to dil nahīñ

ghaTā uThī to hai magar papīhā aaj gaay kyā

taḌap mirī miTā.e kyā lagī mirī bujhā.e kyā

vo prem se bhare bachan ki jin se kān-āshnā

vo mast aañkh mad-bharī ki jis se jaan āshnā

vo baat baat par hañsī vo chheḌ pyaar pyaar meñ

qarār ik taḌap meñ vo taḌap vo ik qarār meñ

kabhī udhar se tāknā kabhī udhar se dekhnā

vo mere dil ke shauq ko mirī nazar se dekhnā

ġharaz vo din ki jab mire chaman meñ ik bahār thī

ġharaz vo din ki jab ḳhushī mire liye siñgār thī

ġharaz vo din ki naġhma-zan masarratoñ kā saaz thā

ġharaz vo din ki husn jab mirā nazar-navāz thā

ġharaz vo din ki jab se dil nishān ġham kā duur thā

ġharaz vo din ki aañkh meñ bharā huā surūr thā

ġharaz vo din ki maiñ bhī jab kisī ke dil kā naaz thī

ġharaz vo din niyāz ke ki jab maiñ be-niyāz thī

ġharaz vo din ḳhayāl thā ki ab na jā.eñge kabhī

chale ga.e kuchh is tarah ki phir na ā.eñge kabhī

ġhazab ye hai shabāb meñ mirā suhāg luT gayā

safar meñ thā jo ham-safar usī kā saath chhuT gayā

ye sach hai mujh ġharīb kā koī rafīq ab nahīñ

ye sach hai ġham-nasīb kā koī shafīq ab nahīñ

fuġhāñ meñ ab vo josh hai ki jis kī intihā nahīñ

jigar meñ ab vo dard hai ki jis kī kuchh davā nahīñ

ḳhayāl hai ḳhizāñ meñ bhī mujhe usī bahār kā

ġhazab hai chhoḌtā nahīñ fareb intizār kā

ajal kī ek shakl hai ye dard is balā kā hai

davā karūñ to kyā karūñ ki vaqt ab duā kā hai

mirī tarah na zindagī kisī kī yuuñ ajiib ho

nasīb maut ho agar to zindagī nasīb ho

kisi ki yaad dil mein hai ki jis se ji niDhaal hai

kahun agar to kya kahun ajab tarah ka haal hai

na wo zamin na wo falak na ab wo kaenat hai

wo zindagi hi ab nahin na din hai wo na raat hai

wo aarzu hai kaun si jo aaj pa-ba-gil nahin

hai nam dil ka dil magar jo sach kahun to dil nahin

ghaTa uThi to hai magar papiha aaj gay kya

taDap meri miTae kya lagi meri bujhae kya

wo prem se bhare bachan ki jin se kan-ashna

wo mast aankh mad-bhari ki jis se jaan aashna

wo baat baat par hansi wo chheD pyar pyar mein

qarar ek taDap mein wo taDap wo ek qarar mein

kabhi udhar se takna kabhi udhar se dekhna

wo mere dil ke shauq ko meri nazar se dekhna

gharaz wo din ki jab mere chaman mein ek bahaar thi

gharaz wo din ki jab KHushi mere liye singar thi

gharaz wo din ki naghma-zan masarraton ka saz tha

gharaz wo din ki husn jab mera nazar-nawaz tha

gharaz wo din ki jab se dil nishan gham ka dur tha

gharaz wo din ki aankh mein bhara hua surur tha

gharaz wo din ki main bhi jab kisi ke dil ka naz thi

gharaz wo din niyaz ke ki jab main be-niyaz thi

gharaz wo din KHayal tha ki ab na jaenge kabhi

chale gae kuchh is tarah ki phir na aaenge kabhi

ghazab ye hai shabab mein mera suhag luT gaya

safar mein tha jo ham-safar usi ka sath chhuT gaya

ye sach hai mujh gharib ka koi rafiq ab nahin

ye sach hai gham-nasib ka koi shafiq ab nahin

fughan mein ab wo josh hai ki jis ki intiha nahin

jigar mein ab wo dard hai ki jis ki kuchh dawa nahin

KHayal hai KHizan mein bhi mujhe usi bahaar ka

ghazab hai chhoDta nahin fareb intizar ka

ajal ki ek shakl hai ye dard is bala ka hai

dawa karun to kya karun ki waqt ab dua ka hai

meri tarah na zindagi kisi ki yun ajib ho

nasib maut ho agar to zindagi nasib ho