bhaarat ke musalman

is daur meñ tū kyuuñ hai pareshān-o-hirāsāñ

kyā baat hai kyuuñ hai mutazalzal terā īmāñ

dānish-kada-e-dahr kī ai sham-e-farozāñ

ai matla-e-tahzīb ke ḳhurshīd-e-daraḳhshāñ

hairat hai ghaTāoñ meñ terā nuur ho tarsāñ

bhārat ke musalmāñ

tū dard-e-mohabbat kā talabgār azal se

tū mehr-o-muravvat kā parastār azal se

tū mahram-e-har-lazzat-e-asrār azal se

virsa terā rānā.i-e-afkār azal se

rānā.i-e-afkār ko kar phir se ġhazal-ḳhvāñ

bhārat ke musalmāñ

hargiz na bhalā 'mīr' kā 'ġhālib' kā tarāna

ban jaa.e kahīñ terī haqīqat na fasāna

qazzāq-e-fanā ko to hai darkār bahāna

tārāj na ho 'qāsim-o-'sayyad' kā ḳhazāna

ai 'qāsim'-o-'sayyad' ke ḳhazāne ke nigahbāñ

bhārat ke musalmāñ

'hāfiz' ke tarannum ko basā qalb-o-nazar meñ

'rūmī' ke tafakkur ko sajā qalb-o-nazar meñ

'sādī' ke takallum ko biThā qalb-o-nazar meñ

de naġhma-e-'ḳhayyām' ko jā qalb-o-nazar meñ

ye lahn ho phir hind kī duniyā meñ ho afshāñ

bhārat ke musalmāñ

tūfān meñ tū DhūñDh rahā hai jo kinārā

amvāj kā kar dīda-e-bātin se nazārā

mumkin hai ki har mauj bane terā sahārā

mumkin hai ki har mauj nazar ko ho gavārā

mumkin hai ki sāhil ho pas-e-parda-e-tūfāñ

bhārat ke musalmāñ

zāhir kī mohabbat se muravvat se guzar jā

bātin kī adāvat se kudūrat se guzar jā

be-kār dil-afgār qayādat se guzar jā

is daur kī bosīda siyāsat se guzar jā

aur azm se phir thaam zarā dāman-e-īmāñ

bhārat ke musalmāñ

islām kī ta.alīm se begāna huā tū

nā-mahram-e-har-jur.at-e-rindāna huā tū

ābādī-e-har-bazm thā vīrāna huā tū

tū ek haqīqat thā ab afsāna huā tū

mumkin ho to phir DhūñDh gañvā.e hue sāmāñ

bhārat ke musalmāñ

ajmer kī dargāh-e-mua.allā terī jāgīr

mahbūb-e-ilāhī kī zamīñ par tirī tanvīr

zarrāt meñ kaliyar ke farozāñ tirī tasvīr

hāñsī kī fazāoñ meñ tire kaif kī tāsīr

sarhind kī miTTī se tire dam se farozāñ

bhārat ke musalmāñ

har zarra-e-dehlī hai tire zau se munavvar

punjab kī mastī asar-e-jazb-e-qalandar

gañgoh kī taqdīs se quddūs sarāsar

paTne kī zamīñ nik.hat-e-ḳhvāja se mo.attar

madras kī miTTī meñ nihāñ tāj-e-shahīdāñ

bhārat ke musalmāñ

'bastāmī'-o-'basarī'-o-'muarrā'-o-'ġhazālī'

jis ilm kī jis faqr kī duniyā ke the vaalī

hairat hai tū ab hai usī duniyā meñ savālī

hai gosha-e-pastī meñ tirī himmat-e-ālī

afsos-sad-afsos tirī tañgī-e-dāmāñ

bhārat ke musalmāñ

maz.hab jise kahte haiñ vo kuchh aur hai pyāre

nafrat se pare is kā har ik taur hai pyāre

maz.hab meñ ta.assub to baḌā jaur hai pyāre

aql-o-ḳhirad-o-ilm kā ye daur hai pyāre

is daur meñ maz.hab kī sadāqat ho numāyāñ

bhārat ke musalmāñ

islām to mehr aur mohabbat kā bayāñ hai

iḳhlās kī rūdād-e-muravvat kā bayāñ hai

har sho.aba-e-hastī meñ sadāqat kā bayāñ hai

ek zinda-o-pā.inda haqīqat kā bayāñ hai

kyuuñ dil meñ tire ho na haqīqat ye farozāñ

bhārat ke musalmāñ

islām kī ta.alīm farāmosh huī kyuuñ

insān kī tāzīm farāmosh huī kyuuñ

afrād kī tanzīm farāmosh huī kyuuñ

ḳhallās kī aqlīm farāmosh huī kyuuñ

hairat meñ huuñ maiñ dekh ke ye ālam-e-nisyāñ

bhārat ke musalmāñ

māhaul kī ho taaza havā tujh ko gavārā

darkār hai tahzīb ko phir terā sahārā

kar aaj na.e rañg se duniyā kā nazārā

chamkegā phir ik baar tire baḳht kā taarā

ho jā.egī tārīkī-e-māhaul gurezāñ

bhārat ke musalmāñ

is daur mein tu kyun hai pareshan-o-hirasan

kya baat hai kyun hai mutazalzal tera iman

danish-kada-e-dahr ki ai sham-e-farozan

ai matla-e-tahzib ke KHurshid-e-daraKHshan

hairat hai ghaTaon mein tera nur ho tarsan

bhaarat ke musalman

tu dard-e-mohabbat ka talabgar azal se

tu mehr-o-murawwat ka parastar azal se

tu mahram-e-har-lazzat-e-asrar azal se

wirsa tera ranai-e-afkar azal se

ranai-e-afkar ko kar phir se ghazal-KHwan

bhaarat ke musalman

hargiz na bhala 'mir' ka 'ghaalib' ka tarana

ban jae kahin teri haqiqat na fasana

qazzaq-e-fana ko to hai darkar bahana

taraj na ho 'qasim-o-'sayyad' ka KHazana

ai 'qasim'-o-'sayyad' ke KHazane ke nigahban

bhaarat ke musalman

'hafiz' ke tarannum ko basa qalb-o-nazar mein

'rumi' ke tafakkur ko saja qalb-o-nazar mein

'sadi' ke takallum ko biTha qalb-o-nazar mein

de naghma-e-'KHayyam' ko ja qalb-o-nazar mein

ye lahn ho phir hind ki duniya mein ho afshan

bhaarat ke musalman

tufan mein tu DhunDh raha hai jo kinara

amwaj ka kar dida-e-baatin se nazara

mumkin hai ki har mauj bane tera sahaara

mumkin hai ki har mauj nazar ko ho gawara

mumkin hai ki sahil ho pas-e-parda-e-tufan

bhaarat ke musalman

zahir ki mohabbat se murawwat se guzar ja

baatin ki adawat se kudurat se guzar ja

be-kar dil-afgar qayaadat se guzar ja

is daur ki bosida siyasat se guzar ja

aur azm se phir tham zara daman-e-iman

bhaarat ke musalman

islam ki talim se begana hua tu

na-mahram-e-har-jurat-e-rindana hua tu

aabaadi-e-har-bazm tha virana hua tu

tu ek haqiqat tha ab afsana hua tu

mumkin ho to phir DhunDh ganwae hue saman

bhaarat ke musalman

ajmer ki dargah-e-mualla teri jagir

mahbub-e-ilahi ki zamin par teri tanwir

zarraat mein kaliyar ke farozan teri taswir

hansi ki fazaon mein tere kaif ki tasir

sarhind ki miTTi se tere dam se farozan

bhaarat ke musalman

har zarra-e-dehli hai tere zau se munawwar

punjab ki masti asar-e-jazb-e-qalandar

gangoh ki taqdis se quddus sarasar

paTne ki zamin nikhat-e-KHwaja se moattar

madras ki miTTi mein nihan taj-e-shahidan

bhaarat ke musalman

'bastami'-o-'basari'-o-'muarra'-o-'ghazali'

jis ilm ki jis faqr ki duniya ke the wali

hairat hai tu ab hai usi duniya mein sawali

hai gosha-e-pasti mein teri himmat-e-ali

afsos-sad-afsos teri tangi-e-daman

bhaarat ke musalman

mazhab jise kahte hain wo kuchh aur hai pyare

nafrat se pare is ka har ek taur hai pyare

mazhab mein tassub to baDa jaur hai pyare

aql-o-KHirad-o-ilm ka ye daur hai pyare

is daur mein mazhab ki sadaqat ho numayan

bhaarat ke musalman

islam to mehr aur mohabbat ka bayan hai

iKHlas ki rudad-e-murawwat ka bayan hai

har shoaba-e-hasti mein sadaqat ka bayan hai

ek zinda-o-painda haqiqat ka bayan hai

kyun dil mein tere ho na haqiqat ye farozan

bhaarat ke musalman

islam ki talim faramosh hui kyun

insan ki tazim faramosh hui kyun

afrad ki tanzim faramosh hui kyun

KHallas ki aqlim faramosh hui kyun

hairat mein hun main dekh ke ye aalam-e-nisyan

bhaarat ke musalman

mahaul ki ho taza hawa tujh ko gawara

darkar hai tahzib ko phir tera sahaara

kar aaj nae rang se duniya ka nazara

chamkega phir ek bar tere baKHt ka tara

ho jaegi tariki-e-mahaul gurezan

bhaarat ke musalman