bhaarat ki adaen

ik duniyā ko taḌpātī haiñ jaanā na adā.eñ bhārat kī

par dil par choT lagātī haiñ pur-dard sadā.eñ bhārat kī

vo is kī zamīñ vo is kā falak vo chāñd kī vo sūraj kī chamak

vo tāroñ kī bāham chashmak dilkash vo fazā.eñ bhārat kī

āñkhoñ ko ThanDak detī haiñ man kī chintā har letī haiñ

ākāsh pe jab chhā jaatī haiñ ghanghor ghaTā.eñ bhārat kī

ik baar yahāñ jo aatā hai bas bhārat kā ho jaatā hai

har dil kī jot jagātī haiñ rañgīn fazā.eñ bhārat kī

kyā ulTā rañg hai duniyā kā kyā auñdhī aql hī duniyā kī

bhārat ke liye janjāl baneñ duniyā se vafā.eñ bhārat kī

lākhoñ bīmār taḌapte haiñ lākhoñ nādār phaḌakte haiñ

bañgāl bihār chalo to zarā hālat dikhlā.eñ bhārat kī

bhārat-bāshī izzat paa.eñ phir in ke achchhe din aa.eñ

is ik maqsad par mil jaa.eñ jitnī bhī sabhā.eñ bhārat kī

phir āzādī ke saaz bajeñ phir des ko apne bhaag lageñ

phir ek ek kar ke puurī hoñ saarī ichhā.eñ bhārat kī

ham sab aapas meñ mil jaa.eñ dil kī kaliyāñ khil khil jaa.eñ

yuuñ mil-jul kar phir duur kareñ saarī biptā.eñ bhārat kī

'gāñdhī' hoñ 'qā.id-e-āzam' hoñ ye hoñ vo hoñ yā koī ho

jo qaum kī ḳhidmat kartā hai paatā hai duā.eñ bhārat kī

jo hindū aur musalmāñ ko shah de de kar laḌvāte haiñ

vo haath se apne karte haiñ tayyār chitāeñ bhārat kī

duniyā ke hilā.e hil na sakeñ duniyā ke miTā.e miT na sakeñ

kuchh aisī haiñ kuchh aisī haiñ mazbūt binā.eñ bhārat kī

'nayyar' ham apnī ḳhidmat se firdaus banā deñ bhārat ko

phir is duniyā meñ az-sar-e-nau ham qadr baḌhā.eñ bhārat kī

ek duniya ko taDpati hain jaana na adaen bhaarat ki

par dil par choT lagati hain pur-dard sadaen bhaarat ki

wo is ki zamin wo is ka falak wo chand ki wo suraj ki chamak

wo taron ki baham chashmak dilkash wo fazaen bhaarat ki

aankhon ko ThanDak deti hain man ki chinta har leti hain

aakash pe jab chha jati hain ghanghor ghaTaen bhaarat ki

ek bar yahan jo aata hai bas bhaarat ka ho jata hai

har dil ki jot jagati hain rangin fazaen bhaarat ki

kya ulTa rang hai duniya ka kya aundhi aql hi duniya ki

bhaarat ke liye janjal banen duniya se wafaen bhaarat ki

lakhon bimar taDapte hain lakhon nadar phaDakte hain

bangal bihaar chalo to zara haalat dikhlaen bhaarat ki

bhaarat-bashi izzat paen phir in ke achchhe din aaen

is ek maqsad par mil jaen jitni bhi sabhaen bhaarat ki

phir aazadi ke saz bajen phir des ko apne bhag lagen

phir ek ek kar ke puri hon sari ichhaen bhaarat ki

hum sab aapas mein mil jaen dil ki kaliyan khil khil jaen

yun mil-jul kar phir dur karen sari biptaen bhaarat ki

'gandhi' hon 'qaid-e-azam' hon ye hon wo hon ya koi ho

jo qaum ki KHidmat karta hai pata hai duaen bhaarat ki

jo hindu aur musalman ko shah de de kar laDwate hain

wo hath se apne karte hain tayyar chitaen bhaarat ki

duniya ke hilae hil na saken duniya ke miTae miT na saken

kuchh aisi hain kuchh aisi hain mazbut binaen bhaarat ki

'nayyar' hum apni KHidmat se firdaus bana den bhaarat ko

phir is duniya mein az-sar-e-nau hum qadr baDhaen bhaarat ki