bhayanak KHwab

zindagī ek ḳhvāb hai bhayānak ḳhvāb

ghaḌiyāl par raat ke bārah baj chuke haiñ

magar merī khulī āñkhoñ se dekhā gayā

bhayānak ḳhvāb merī niiñd kī

niiñd uḌā chukā hai

mere hāthoñ kī kāmyābī kī lakīroñ ne

mere hāthoñ se hijrat kar lī hai

parinde merā dard samajhte haiñ

lekin vo apnī zabān meñ in

insānoñ ko nahīñ samjhā sakte

mujhe ab ḳhvāboñ se ḳhauf aatā hai

har raat merā ek ḳhvāb

merī pāñch rātoñ kī nīñdoñ kī

hijrat kā sabab bantā hai

merī niiñd kī ḳhātir

raat ab pachchīsveñ ghanTe kī paidā.ish

ke liye tayyār ho ga.ī hai

parinde mere janam-din kī tayārī

meñ masrūf haiñ

aur maiñ is soch meñ gum huuñ

kyā zindagī vāqa.ī ek ḳhvāb hai

ek bhayānak ḳhvāb

lekin shāyad zindagī ek nazm hai

jo taklīfoñ kī havelī hai

zindagi ek KHwab hai bhayanak KHwab

ghaDiyal par raat ke barah baj chuke hain

magar meri khuli aankhon se dekha gaya

bhayanak KHwab meri nind ki

nind uDa chuka hai

mere hathon ki kaamyabi ki lakiron ne

mere hathon se hijrat kar li hai

parinde mera dard samajhte hain

lekin wo apni zaban mein in

insanon ko nahin samjha sakte

mujhe ab KHwabon se KHauf aata hai

har raat mera ek KHwab

meri panch raaton ki nindon ki

hijrat ka sabab banta hai

meri nind ki KHatir

raat ab pachchiswen ghanTe ki paidaish

ke liye tayyar ho gai hai

parinde mere janam-din ki tayari

mein masruf hain

aur main is soch mein gum hun

kya zindagi waqai ek KHwab hai

ek bhayanak KHwab

lekin shayad zindagi ek nazm hai

jo taklifon ki haweli hai