bhikaran ki laDki

sach maan bhikāran kī laḌkī maiñ dil kī baat sunātā huuñ

tū haath apnā phailā.e hai aur maiñ sharmāyā jaatā huuñ

tū mujh ko duā.eñ detī hai aur maiñ aañsū barsātā huuñ

tū jin fāqoñ kī maarī hai maiñ bhī un se Takrātā huuñ

phir tū hī jī meñ soch zarā duuñ bhī tujh ko to kyā duuñ maiñ

sach maan bhikāran kī laḌkī terī hī tarah muflis huuñ maiñ

iflās ke tāne-bāne meñ merā terā uljhāo vahī

mere aur tere kāñTe par dukh aur sukh kā hai bhaav vahī

tere siine par choT hai jo mere dil meñ hai ghaav vahī

terī jo TuuTī kashtī hai merī hai shikasta naav vahī

phir tū hī jī meñ soch zarā duuñ bhī tujh ko to kyā duuñ maiñ

sach maan bhikāran kī laḌkī terī hī tarah muflis huuñ maiñ

maiñ jhoñpaḌiyoñ meñ rahtā huuñ terā pul ke nīche maskan

donoñ meñ taaq na mehrābeñ kaisī baiThak kaisā āñgan

pul ke nīche tārīkī se khelī na kabhī sūraj kī kiran

aur chāñd darīchoñ se mujh ko dene aaya na kabhī darshan

phir tū hī jī meñ soch zarā duuñ bhī tujh ko to kyā duuñ maiñ

sach maan bhikāran kī laḌkī terī hī tarah muflis huuñ maiñ

qudrat ne ek siyāhī se donoñ kī likhī haiñ taqdīreñ

khīñchī haiñ ek hī kāġhaz par iflās kī donoñ tasvīreñ

hāthoñ kī lakīreñ miltī haiñ māthe kī haiñ yaksāñ tahrīreñ

donoñ kī ashk-bharī āñkheñ bad-baḳhtī kī haiñ ta.abīreñ

phir tū hī jī meñ soch zarā duuñ bhī tujh ko to kyā duuñ maiñ

sach maan bhikāran kī laḌkī terī tarah muflis huuñ maiñ

ye gaaḌe kī shalvār tirī bosīda aur purānī hai

kurtā phaT jaane ke baa.is tū sharm se pānī-pānī hai

ye merī bhī mailī chādar jo merī maañ kī nishānī hai

bas jāḌoñ kī hai shaal yahī barkhā kī machchhar-dānī hai

phir tū hī jī meñ soch zarā duuñ bhī tujh ko to kyā duuñ maiñ

sach maan bhikāran kī laḌkī terī hī tarah muflis huuñ maiñ

ab tujh se ruḳhsat hotā huuñ tujh par ho rahmat kā saayā

kis muflis shā.ir ke aage tū ne bhī dāman phailāyā

siine meñ dāġhoñ kī daulat āñkhoñ meñ ashkoñ kī maayā

qassām-e-azal ke hāthoñ se bas is ke sivā aur kyā paayā

phir tū hī jī meñ soch zarā duuñ bhī tujh ko to kyā duuñ maiñ

sach maan bhikāran kī laḌkī terī hī tarah muflis huuñ maiñ

sach man bhikaran ki laDki main dil ki baat sunata hun

tu hath apna phailae hai aur main sharmaya jata hun

tu mujh ko duaen deti hai aur main aansu barsata hun

tu jin faqon ki mari hai main bhi un se Takraata hun

phir tu hi ji mein soch zara dun bhi tujh ko to kya dun main

sach man bhikaran ki laDki teri hi tarah muflis hun main

iflas ke tane-bane mein mera tera uljhao wahi

mere aur tere kanTe par dukh aur sukh ka hai bhaw wahi

tere sine par choT hai jo mere dil mein hai ghaw wahi

teri jo TuTi kashti hai meri hai shikasta naw wahi

phir tu hi ji mein soch zara dun bhi tujh ko to kya dun main

sach man bhikaran ki laDki teri hi tarah muflis hun main

main jhonpaDiyon mein rahta hun tera pul ke niche maskan

donon mein taq na mehraben kaisi baiThak kaisa aangan

pul ke niche tariki se kheli na kabhi suraj ki kiran

aur chand darichon se mujh ko dene aaya na kabhi darshan

phir tu hi ji mein soch zara dun bhi tujh ko to kya dun main

sach man bhikaran ki laDki teri hi tarah muflis hun main

qudrat ne ek siyahi se donon ki likhi hain taqdiren

khinchi hain ek hi kaghaz par iflas ki donon taswiren

hathon ki lakiren milti hain mathe ki hain yaksan tahriren

donon ki ashk-bhari aankhen bad-baKHti ki hain tabiren

phir tu hi ji mein soch zara dun bhi tujh ko to kya dun main

sach man bhikaran ki laDki teri tarah muflis hun main

ye gaDe ki shalwar teri bosida aur purani hai

kurta phaT jaane ke bais tu sharm se pani-pani hai

ye meri bhi maili chadar jo meri man ki nishani hai

bas jaDon ki hai shaal yahi barkha ki machchhar-dani hai

phir tu hi ji mein soch zara dun bhi tujh ko to kya dun main

sach man bhikaran ki laDki teri hi tarah muflis hun main

ab tujh se ruKHsat hota hun tujh par ho rahmat ka saya

kis muflis shair ke aage tu ne bhi daman phailaya

sine mein daghon ki daulat aankhon mein ashkon ki maya

qassam-e-azal ke hathon se bas is ke siwa aur kya paya

phir tu hi ji mein soch zara dun bhi tujh ko to kya dun main

sach man bhikaran ki laDki teri hi tarah muflis hun main