bhikari

ai bhikārī tujhe kaahe ko yaqīñ aa.egā

maiñ bhī terī hī tarah vaqf-e-ġham-e-daurāñ huuñ

yaar tū bhī nigah-e-qahr kā maarā hai magar

kam se kam tere liye raunaq-e-bāzār to hai

mere aañsū hī to haiñ mere liye la.al-o-gohar

tere kashkol meñ kuchh sikkoñ kī jhankār to hai

jab bhī dekhā mujhe lalchā.ī huī nazroñ se

mahfil-e-dahr meñ jī hai ki umañD aaya hai

mujh ko ḳhush karne kī ḳhātir ye duā.eñ kaisī

in duāoñ ne to kuchh aur bhī taḌpāyā hai

log ākāsh se aa.e ki ye ġham duur kareñ

baat pahuñchī to gulistāñ se bayābānoñ tak

haañ magar vo ki jo māhir haiñ lahū piine meñ

haath pahuñchā hī nahīñ un ke garebānoñ tak

kahne ko 'hātim'-o-'qārūn'-o-'karan' bhī aa.e

apne hisse meñ vahī ranj-o-mehan haiñ ki jo the

jur.at-e-'īsā'-o-'mansūr' se bhī kuchh na huā

roz-o-shab marhala-e-dār-o-rasan haiñ ki jo the

dar-ba-dar yūñhī ham āvāra phireñge kab tak

kyoñ na haq chhīn leñ is dahr-e-jafākār se ham

ai bhikari tujhe kahe ko yaqin aaega

main bhi teri hi tarah waqf-e-gham-e-dauran hun

yar tu bhi nigah-e-qahr ka mara hai magar

kam se kam tere liye raunaq-e-bazar to hai

mere aansu hi to hain mere liye lal-o-gohar

tere kashkol mein kuchh sikkon ki jhankar to hai

jab bhi dekha mujhe lalchai hui nazron se

mahfil-e-dahr mein ji hai ki umanD aaya hai

mujh ko KHush karne ki KHatir ye duaen kaisi

in duaon ne to kuchh aur bhi taDpaya hai

log aakash se aae ki ye gham dur karen

baat pahunchi to gulistan se bayabanon tak

han magar wo ki jo mahir hain lahu pine mein

hath pahuncha hi nahin un ke garebanon tak

kahne ko 'hatim'-o-'qarun'-o-'karan' bhi aae

apne hisse mein wahi ranj-o-mehan hain ki jo the

jurat-e-'isa'-o-'mansur' se bhi kuchh na hua

roz-o-shab marhala-e-dar-o-rasan hain ki jo the

dar-ba-dar yunhi hum aawara phirenge kab tak

kyon na haq chhin len is dahr-e-jafakar se hum