bhul bhaliyan

ḳhush thī kashtī lagā kar gale se hameñ

ye hamārī ham us ke nigah-dār the

ham musāfir savār us meñ jitne bhī the

us kī barqī adā ke parastār the

us ko shāyad thā ma.alūm us se faqat

sipurd-e-tafrīh ke ham talabgār the

le ga.ī pal meñ un pāniyoñ tak hameñ

jo talātum kī lahroñ se kaf-e-dār the

jañgaloñ se bharī sīdhī Dhalvāñ par

husn roīdagī ke fusūñ zaar the

donoñ jānib taToñ pe safede ke peḌ

chiknī chiknī sī chhāloñ kī dīvār the

har tanā phab rahā thā hare suiT meñ

sabz shāḳhoñ ke patte chamakdār the

puure joban par aa.ī huī ghaas thī

ūñche ūñche zamurrad ke ambār the

jis taraf bhī kahīñ barf kī oT thī

oT meñ surḳh phaloñ ke añgār the

sar nikāle hue pattharoñ ke kalas

marġh-zāroñ ke mahloñ mīnār the

meñh kī būñdoñ ke sar ho rahe the qalam

tez jhuuT the yā tez talvār the

barq-o-bārāñ kā tūfāñ javāñ sā huā

barf ke saath paanī ravāñ sā huā

ye huā to hameñ ye gumāñ sā huā

ye manāzir thī un ghaḌsī jin kī phaban

pur-ḳhatar se kisī fan kā me.aar the

ik muhim jo musavvir kā shahkār the

yuuñ to ham bhī musavvir the fankār the

rañg-o-alfāz ke kaif meñ Duub kar

ḳhud hī ko DhūñDne ke talabgār the

ḳhud hī girdāb the ḳhud hī mañjhdār the

dushman-e-jāñ hamāre hī afkār the

pech dar pech dil meñ giraftār the

ham na is paar the ham na us paar the

KHush thi kashti laga kar gale se hamein

ye hamari hum us ke nigah-dar the

hum musafir sawar us mein jitne bhi the

us ki barqi ada ke parastar the

us ko shayad tha malum us se faqat

sipurd-e-tafrih ke hum talabgar the

le gai pal mein un paniyon tak hamein

jo talatum ki lahron se kaf-e-dar the

jangalon se bhari sidhi Dhalwan par

husn roidagi ke fusun zar the

donon jaanib taTon pe safede ke peD

chikni chikni si chhaalon ki diwar the

har tana phab raha tha hare suiT mein

sabz shaKHon ke patte chamakdar the

pure joban par aai hui ghas thi

unche unche zamurrad ke ambar the

jis taraf bhi kahin barf ki oT thi

oT mein surKH phalon ke angar the

sar nikale hue pattharon ke kalas

margh-zaron ke mahlon minar the

meinh ki bundon ke sar ho rahe the qalam

tez jhuT the ya tez talwar the

barq-o-baran ka tufan jawan sa hua

barf ke sath pani rawan sa hua

ye hua to hamein ye guman sa hua

ye manazir thi un ghaDsi jin ki phaban

pur-KHatar se kisi fan ka mear the

ek muhim jo musawwir ka shahkar the

yun to hum bhi musawwir the fankar the

rang-o-alfaz ke kaif mein Dub kar

KHud hi ko DhunDne ke talabgar the

KHud hi girdab the KHud hi manjhdar the

dushman-e-jaan hamare hi afkar the

pech dar pech dil mein giraftar the

hum na is par the hum na us par the