بھول گئے

تغئیر زمانہ کے ہاتھوں خود اپنی حقیقت بھول گئے

دنیا کے طریقے یاد رہے خود اپنی طریقت بھول گئے

گلہائے تمنا چن چن کے آرائش محفل یاد رہی

کلیوں کا مسلنا یاد رہا پھولوں کی نزاکت بھول گئے

ہر شام فدائے نوش رہے ہر صبح خمار آلود رہے

آغاز مسرت یاد رہا انجام مسرت بھول گئے

دامان نظر کے پرتو میں تخئیل کے گونا گوں نقشے

اک نقش تصور بن تو گئے پر اپنی ہی صورت بھول گئے

اللہ رے فریب رنگ عمل مدہوشیٔ عالم کیا کہنا

گرداب حوادث سے نکلے طوفان کی حالت بھول گئے

ایمان و محبت کے جلوے سب نفس کے تابع ہو کے رہے

پیمانۂ الفت پھینک دیا پیمان محبت بھول گئے

جب آنکھ لگی مجبور نہ تھے بیدار ہوئے مایوس ہوئے

اے رہرو منزل راہ بتا ہم راہ صداقت بھول گئے

محفل بھی وہی مطرب بھی وہی صہبا بھی وہی ساغر بھی وہی

مے نوش جو پینے آئے تھے صہبائے محبت بھول گئے