bhul gae

taġh.īr-e-zamāna ke hāthoñ ḳhud apnī haqīqat bhuul ga.e

duniyā ke tarīqe yaad rahe ḳhud apnī tarīqat bhuul ga.e

gulhā-e-tamanna chun chun ke ārā.ish-e-mahfil yaad rahī

kaliyoñ kā masalnā yaad rahā phūloñ kī nazākat bhuul ga.e

har shaam fidā-e-nosh rahe har sub.h ḳhumār-ālūd rahe

āġhāz-e-masarrat yaad rahā anjām-e-masarrat bhuul ga.e

dāmān-e-nazar ke partav meñ taḳh.īl ke gūnā-gūñ naqshe

ik naqsh-e-tasavvur ban to ga.e par apnī hī sūrat bhuul ga.e

allāh-re fareb-e-rang-e-amal mad.hoshī-e-ālam kyā kahnā

girdāb-e-havādis se nikle tūfān kī hālat bhuul ga.e

īmān-o-mohabbat ke jalve sab nafs ke taabe ho ke rahe

paimāna-e-ulfat pheñk diyā paimān-e-mohabbat bhuul ga.e

jab aañkh lagī majbūr na the bedār hue māyūs hue

ai rahrav-e-manzil raah batā ham rāh-e-sadāqat bhuul ga.e

mahfil bhī vahī mutrib bhī vahī sahbā bhī vahī sāġhar bhī vahī

mai-nosh jo piine aa.e the sahbā-e-mohabbat bhuul ga.e

taghir-e-zamana ke hathon KHud apni haqiqat bhul gae

duniya ke tariqe yaad rahe KHud apni tariqat bhul gae

gulha-e-tamanna chun chun ke aaraish-e-mahfil yaad rahi

kaliyon ka masalna yaad raha phulon ki nazakat bhul gae

har sham fida-e-nosh rahe har subh KHumar-alud rahe

aaghaz-e-masarrat yaad raha anjam-e-masarrat bhul gae

daman-e-nazar ke partaw mein taKHil ke guna-gun naqshe

ek naqsh-e-tasawwur ban to gae par apni hi surat bhul gae

allah-re fareb-e-rang-e-amal madhoshi-e-alam kya kahna

girdab-e-hawadis se nikle tufan ki haalat bhul gae

iman-o-mohabbat ke jalwe sab nafs ke tabe ho ke rahe

paimana-e-ulfat phenk diya paiman-e-mohabbat bhul gae

jab aankh lagi majbur na the bedar hue mayus hue

ai rahraw-e-manzil rah bata hum rah-e-sadaqat bhul gae

mahfil bhi wahi mutrib bhi wahi sahba bhi wahi saghar bhi wahi

mai-nosh jo pine aae the sahba-e-mohabbat bhul gae