bhut

bastī meñ ḳhauf utartā hai galiyoñ meñ hū phailātā huuñ

pīpal ke nīche shaam Dhale apnā darbār lagātā huuñ

tum raat ga.e tak bistar meñ betāl kathā.eñ paḌhte ho

maiñ chupke-chupke nīñdoñ meñ maayā ke jaal bichhātā huuñ

kuchh Darte ho ghabrāte ho tum siiTī laakh bajāte ho

vīrāne meñ jab chalte ho maiñ pīchhe-pīchhe aatā huuñ

tum ne bhī sunā hogā shāyad maiñ ghaTte chāñd kī rātoñ meñ

sannāTe kī paa.el bāñdhe marghaT meñ naach dikhātā huuñ

jab Dhaa.ī ghaḌī kuchh gaane kī ḳhvāhish angḌā.ī letī hai

maiñ duur kahīñ sargoshī meñ vahshat kā giit sunātā huuñ

shai koī bhaTaktī āñgan meñ rah-rah ke dikhā.ī detī hai

taftīsh karo to kurte kā dhundlā saayā ban jaatā huuñ

hai raaz kī baat suno 'tāriq' lekin ye kisī se mat kahnā

maiñ bhuut huuñ vahmī logoñ ke zehnoñ meñ aan samātā huuñ

basti mein KHauf utarta hai galiyon mein hu phailata hun

pipal ke niche sham Dhale apna darbar lagata hun

tum raat gae tak bistar mein betal kathaen paDhte ho

main chupke-chupke nindon mein maya ke jal bichhata hun

kuchh Darte ho ghabraate ho tum siTi lakh bajate ho

virane mein jab chalte ho main pichhe-pichhe aata hun

tum ne bhi suna hoga shayad main ghaTte chand ki raaton mein

sannaTe ki pael bandhe marghaT mein nach dikhata hun

jab Dhai ghaDi kuchh gane ki KHwahish angDai leti hai

main dur kahin sargoshi mein wahshat ka git sunata hun

shai koi bhaTakti aangan mein rah-rah ke dikhai deti hai

taftish karo to kurte ka dhundla saya ban jata hun

hai raaz ki baat suno 'tariq' lekin ye kisi se mat kahna

main bhut hun wahmi logon ke zehnon mein aan samata hun