bhut

mire huoñ se Daro nahīñ

ye kahā thā tum ne

jo mar ga.e

vo zamīñ ke andar utar ga.e

in mare huoñ kī bhaTaktī phirtī

ḳhushī ġhamī ke azaab sahtī

nahīf rūhoñ se Darnā kaisā

kahā thā tum ne

nahīñ

maiñ Dartā nahīñ huuñ un se

bhaTaktī phirtī

zamīñ kā chakkar lagātī rūhoñ se ḳhauf kaisā

jo ḳhud patañge ke karb meñ mubtalā hoñ un se

kisī ko ḳhatra nahīñ hai koī

magar maiñ Dartā huuñ un ke Dhāñchoñ se

jo zamīn meñ utar ga.e the

zamīñ ke pāToñ meñ pis ga.e the

vo ḳhushk Dhāñche ki aaj aaseb ban ga.e haiñ

zamīñ ke andhe kueñ se bāhar nikal paḌe haiñ

nahīñ ye rūheñ nahīñ haiñ bhaa.ī

ye sab dhueñ ke kasīf halqe haiñ

bhuut haiñ un mare huoñ ke

jo sabz dhartī ke gard chakkar lagā rahe haiñ

jo garm bojhal muhīb sāñsoñ

kī parchhā.iyoñ se

zamīñ kā panDā jalā rahe haiñ

diyā zamīñ kā bujhā rahe haiñ

mere huon se Daro nahin

ye kaha tha tum ne

jo mar gae

wo zamin ke andar utar gae

in mare huon ki bhaTakti phirti

KHushi ghami ke azab sahti

nahif ruhon se Darna kaisa

kaha tha tum ne

nahin

main Darta nahin hun un se

bhaTakti phirti

zamin ka chakkar lagati ruhon se KHauf kaisa

jo KHud patange ke karb mein mubtala hon un se

kisi ko KHatra nahin hai koi

magar main Darta hun un ke Dhanchon se

jo zamin mein utar gae the

zamin ke paTon mein pis gae the

wo KHushk Dhanche ki aaj aaseb ban gae hain

zamin ke andhe kuen se bahar nikal paDe hain

nahin ye ruhen nahin hain bhai

ye sab dhuen ke kasif halqe hain

bhut hain un mare huon ke

jo sabz dharti ke gard chakkar laga rahe hain

jo garm bojhal muhib sanson

ki parchhaiyon se

zamin ka panDa jala rahe hain

diya zamin ka bujha rahe hain