bigDa TV

mire nazdīk ke ghar meñ hai ik T-V ajab aayā

use jaane kahāñ se merā ham-sāya uThā laayā

shab-e-avval hī zālim ne kuchh aisā sehr farmāyā

ki jis ne bhī use dekhā vahī ghabrā ke chillāyā

yahāñ ik pal na Thahro bhāgne meñ āfiyat jaano

jo dekhoge to miT jāoge ai ġhāfil musalmāno

ye apnī cabinet jitnī bhī hai rangīn rakhtā hai

ba-īñ ḳhūbī dil-e-yārāñ ko pur-taskīn rakhtā hai

haTā leñ iiñT to Tāñgeñ ye sāḌhe tiin rakhtā hai

ye vo T-V hai jo tiis inch kī scrēn rakhtā hai

hai chhat par antenna lekin nahīñ hai koī kaam us kā

hai garche charḳh-e-nīlī-fām se aage maqām us kā

kisī māhir se is kī hashr-sāmānī nahīñ jaatī

koī bhī ramz is kam-baḳht kī jaanī nahīñ jaatī

ba-sad koshish bhī dhabboñ kī farāvānī nahīñ jaatī

jabhī to shakl koī mujh se pahchānī nahīñ jaatī

judā merī qayās-ārā.ī se har ahl-e-fan niklā

maiñ jis ko reshmāñ samajhtā thā vo mehdī-hasan niklā

machine us kī karishme nit-na.e ham ko dikhātī hai

nirāle gul khilātī hai ajab jaadū jagātī hai

ye daurān-e-amal kuchh aisā chakkar bhī chalātī hai

sadā pinDī se aur tasvīr amritsar se aatī hai

udhar ik shaḳhs kī taqrīr kā elaan hotā hai

idhar T-V pe lekin raqs kā sāmān hotā hai

mire vo dost ab shām-o-sahar ġhamgīn rahte haiñ

uThā kar sar pe T-V dard ke dariyā meñ bahte haiñ

vo che-mī-goīyāñ ik ek ham-sā.e kī sahte haiñ

ruḳh-e-barham ke aage T-V rakh kar ab ye kahte haiñ

ki is T-V se to mahrūmī-e-T.v hī behtar hai

takalluf bartaraf is se mirī biivī hī behtar hai

mere nazdik ke ghar mein hai ek T-V ajab aaya

use jaane kahan se mera ham-saya uTha laya

shab-e-awwal hi zalim ne kuchh aisa sehr farmaya

ki jis ne bhi use dekha wahi ghabra ke chillaya

yahan ek pal na Thahro bhagne mein aafiyat jaano

jo dekhoge to miT jaoge ai ghafil musalmano

ye apni cabinet jitni bhi hai rangin rakhta hai

ba-in KHubi dil-e-yaran ko pur-taskin rakhta hai

haTa len inT to Tangen ye saDhe tin rakhta hai

ye wo T-V hai jo tis inch ki screen rakhta hai

hai chhat par antenna lekin nahin hai koi kaam us ka

hai garche charKH-e-nili-fam se aage maqam us ka

kisi mahir se is ki hashr-samani nahin jati

koi bhi ramz is kam-baKHt ki jaani nahin jati

ba-sad koshish bhi dhabbon ki farawani nahin jati

jabhi to shakl koi mujh se pahchani nahin jati

juda meri qayas-arai se har ahl-e-fan nikla

main jis ko reshman samajhta tha wo mehdi-hasan nikla

machine us ki karishme nit-nae hum ko dikhati hai

nirale gul khilati hai ajab jadu jagati hai

ye dauran-e-amal kuchh aisa chakkar bhi chalati hai

sada pinDi se aur taswir amritsar se aati hai

udhar ek shaKHs ki taqrir ka elan hota hai

idhar T-V pe lekin raqs ka saman hota hai

mere wo dost ab sham-o-sahar ghamgin rahte hain

uTha kar sar pe T-V dard ke dariya mein bahte hain

wo che-mi-goiyan ek ek ham-sae ki sahte hain

ruKH-e-barham ke aage T-V rakh kar ab ye kahte hain

ki is T-V se to mahrumi-e-Tw hi behtar hai

takalluf bartaraf is se meri biwi hi behtar hai