bi meinDki

bādal uThā aur chhā gayā

sāvan kā meñh barsā gayā

jañgal meñ jal-thal ho gayā

nahroñ meñ paanī aa gayā

aur aa ga.iiñ bī meñDkī

bachchoñ ne jab dekhā unheñ

sabze pe lapke gher kar

bī meñDkī ne jis ghaḌī

dekhā unheñ muñh pher kar

ghabrā ga.iiñ bī meñDkī

bhāgīñ kabhī uchhlīñ kabhī

dauḌīñ kabhī uchkīñ kabhī

lapkīñ kabhī kūdīñ kabhī

phāñdīñ kabhī phudkīñ kabhī

tañg aa ga.iiñ bī meñDkī

sabze ke andar chhup rahīñ

jab thak ga.iiñ uktā ga.iiñ

bachchoñ ke hāthoñ se magar

jātīñ kahāñ haath aa ga.iiñ

haath aa ga.iiñ bī meñDkī

murda banī thiiñ makr se

bachche ye samjhe mar ga.iiñ

tañg aa ke un ke zulm se

duniyā se rehlat kar ga.iiñ

kaam aa ga.iiñ bī meñDkī

pheñkā pakaḌ kar ek ne

bī meñDkī ko nahr meñ

bī meñDkī ne aap ko

bahtā jo paayā lahar meñ

lahrā ga.iiñ bī meñDkī

pyāsī jo thiiñ kuchh der se

seroñ hī paanī pī ga.iiñ

phir lapkīñ ḳhushkī kī taraf

bachchoñ ne dekhā jī ga.iiñ

aur aa ga.iiñ bī meñDkī

chupke se ik laḌkā baḌhā

aur haath maarā zor se

bī meñDkī kā sar lagā

patthar kī chubhtī kor se

murjhā ga.iiñ bī meñDkī

bī meñDkī meñ dam na thā

dekhā jo muTThī khol kar

bachchoñ ne chillā kar kahā

lo ab ke to sach-much safar

farmā ga.iiñ bī meñDkī

baadal uTha aur chha gaya

sawan ka meinh barsa gaya

jangal mein jal-thal ho gaya

nahron mein pani aa gaya

aur aa gain bi meinDki

bachchon ne jab dekha unhen

sabze pe lapke gher kar

bi meinDki ne jis ghaDi

dekha unhen munh pher kar

ghabra gain bi meinDki

bhagin kabhi uchhlin kabhi

dauDin kabhi uchkin kabhi

lapkin kabhi kudin kabhi

phandin kabhi phudkin kabhi

tang aa gain bi meinDki

sabze ke andar chhup rahin

jab thak gain ukta gain

bachchon ke hathon se magar

jatin kahan hath aa gain

hath aa gain bi meinDki

murda bani thin makr se

bachche ye samjhe mar gain

tang aa ke un ke zulm se

duniya se rehlat kar gain

kaam aa gain bi meinDki

phenka pakaD kar ek ne

bi meinDki ko nahr mein

bi meinDki ne aap ko

bahta jo paya lahar mein

lahra gain bi meinDki

pyasi jo thin kuchh der se

seron hi pani pi gain

phir lapkin KHushki ki taraf

bachchon ne dekha ji gain

aur aa gain bi meinDki

chupke se ek laDka baDha

aur hath mara zor se

bi meinDki ka sar laga

patthar ki chubhti kor se

murjha gain bi meinDki

bi meinDki mein dam na tha

dekha jo muTThi khol kar

bachchon ne chilla kar kaha

lo ab ke to sach-much safar

farma gain bi meinDki