bij andar hai

biij andar hai

lekin maiñ bāhar huuñ

apnī zamīñ se

faqat musht do musht uupar

ḳhalā meñ ugā huuñ

mirī koī jaḌ hī nahīñ hai

nahīñ ilm

tālīf kī raushnī ne

havā aur paanī ne kis tarah sīñchā

namī kaise mere masāmoñ meñ aa.ī

judā.ī

sahī maiñ ne kaise

muqarrar jo azaloñ se thā

biich kā fāsla

vast nā vast kā marhala

maiñ ne kaise gavārā kiyā

āsmāñ ke tale

maiñ ne dhartī pe phaile hue

ek soñdhī sī ḳhushbū meñ lipTe hue

lahlahāte jahānoñ kā

ḳhushk aur banjar zamānoñ kā

kaise nazāra kiyā

chand kāñToñ kī suuī se

kaunain ke

apne qutbain ke

pech-o-ḳham meñ

vajūd-o-adam meñ

jalī aur ḳhafī saare ab.aad kī samt

kaise ishāra kiyā

maiñ ne kaise ba-yak vaqt

apnī fanā aur baqā se kināra kiyā

biij andar hai

kaise samajh pā.egā

be-numū o numū-kār duniyā meñ

mujh jaise paude ne

kaise guzārā kiyā

bij andar hai

lekin main bahar hun

apni zamin se

faqat musht do musht upar

KHala mein uga hun

meri koi jaD hi nahin hai

nahin ilm

talif ki raushni ne

hawa aur pani ne kis tarah sincha

nami kaise mere masamon mein aai

judai

sahi main ne kaise

muqarrar jo azalon se tha

bich ka fasla

wast na wast ka marhala

main ne kaise gawara kiya

aasman ke tale

main ne dharti pe phaile hue

ek sondhi si KHushbu mein lipTe hue

lahlahate jahanon ka

KHushk aur banjar zamanon ka

kaise nazara kiya

chand kanTon ki sui se

kaunain ke

apne qutbain ke

pech-o-KHam mein

wajud-o-adam mein

jali aur KHafi sare abaad ki samt

kaise ishaara kiya

main ne kaise ba-yak waqt

apni fana aur baqa se kinara kiya

bij andar hai

kaise samajh paega

be-numu o numu-kar duniya mein

mujh jaise paude ne

kaise guzara kiya