bijli ke intizar mein

bahut uchhle vazīr-e-tāb-kārī vo nahīñ aa.ī

andhere meñ ye shab-e-tanhā guzārī vo nahīñ aa.ī

kisī ne chaar chhai das martaba kaaTā thā gāloñ par

maiñ kartā hī rahā machchhar-shumārī vo nahīñ aa.ī

hamāre ishq kī tajdīd meñ thā vāpDā haa.il

andhere hī meñ zulf us kī sañvārī vo nahīñ aa.ī

hamāre mulk meñ nūr-e-adālat aam karne ko

bahut garjā thā adl-e-iftiḳhārī vo nahīñ aa.ī

zarā sī der ko bād-e-bahārī aa.ī thī lekin

taḌap uTThe the garmī se bihārī vo nahīñ aa.ī

mohalle se to sab aa.e the sham-e-ārzū le kar

hukūmat kā thā shāyad paañv bhārī vo nahīñ aa.ī

kiyā santosh ne inkār jab pañkhe ko jhalne se

to chhat par so ga.ī mīnā-kumārī vo nahīñ aa.ī

hamārī bebasī kā ab tamāsha dekhte kyā ho

sitāro tum to so jaao hamārī vo nahīñ aa.ī

bahut uchhle wazir-e-tab-kari wo nahin aai

andhere mein ye shab-e-tanha guzari wo nahin aai

kisi ne chaar chhai das martaba kaTa tha galon par

main karta hi raha machchhar-shumari wo nahin aai

hamare ishq ki tajdid mein tha wapDa hail

andhere hi mein zulf us ki sanwari wo nahin aai

hamare mulk mein nur-e-adalat aam karne ko

bahut garja tha adl-e-iftiKHari wo nahin aai

zara si der ko baad-e-bahaari aai thi lekin

taDap uTThe the garmi se bihaari wo nahin aai

mohalle se to sab aae the sham-e-arzu le kar

hukumat ka tha shayad panw bhaari wo nahin aai

kiya santosh ne inkar jab pankhe ko jhalne se

to chhat par so gai mina-kumari wo nahin aai

hamari bebasi ka ab tamasha dekhte kya ho

sitaro tum to so jao hamari wo nahin aai