bil-jabr

har taraf katraneñ haiñ

vo guḌiyā yahīñ thī magar ab dikhā.ī nahīñ de rahī

aur ye dhāge, yaqīnan vo gesū haiñ jin ke liye merī rāteñ kaTīñ

ruuī dhunkī huī hai

kahīñ ḳhuun kā koī dhabba nahīñ

ik taraf us kī poshāk udhḌī paḌī hai

udhar us kī āñkheñ, kaTe abrūoñ se alag,

ḳhauf-o-dahshat meñ luthḌī huī

har taraf katraneñ haiñ

badan resha resha hai

nīche kā dhaḌ chiil kavve uThā le ga.e

laboñ kā lahū jam gayā hai

(lahū jo yaqīnan kisī aur kā hai)

gale par kisī gurg ke daañt khīñche hue haiñ

vo guḌiyā nahīñ hai magar har taraf katraneñ haiñ

maiñ ā.inda guḌiyā kī ḳhātir kapās aur dhāge nahīñ lā.ūñgā

katraneñ le ke apnī kisī aur jānib nikal jā.ūñgā

har taraf katranen hain

wo guDiya yahin thi magar ab dikhai nahin de rahi

aur ye dhage, yaqinan wo gesu hain jin ke liye meri raaten kaTin

rui dhunki hui hai

kahin KHun ka koi dhabba nahin

ek taraf us ki poshak udhDi paDi hai

udhar us ki aankhen, kaTe abruon se alag,

KHauf-o-dahshat mein luthDi hui

har taraf katranen hain

badan resha resha hai

niche ka dhaD chil kawwe uTha le gae

labon ka lahu jam gaya hai

(lahu jo yaqinan kisi aur ka hai)

gale par kisi gurg ke dant khinche hue hain

wo guDiya nahin hai magar har taraf katranen hain

main aainda guDiya ki KHatir kapas aur dhage nahin launga

katranen le ke apni kisi aur jaanib nikal jaunga