billi

dabe paañv chaltī chalī aa.egī

kisī garm kone meñ chupke se baiThegī

bilaurī āñkheñ ghumātī rahegī

kabhī ek halkī jamāhī bhī legī

dekhte dekhte jism se uThne vaalī mahak

saare kamre meñ bhar jā.egī

dayār-e-ġharībāñ se aayā huā ik udheḌ umr chuhā

jo bas rizq kī bū ko pahchāntā hai

jo har vaqt bīmār har vaqt bezār chuhiyā se tañg aa chukā hai

use dekh legā to jī jā.egā

shauq-e-vāraftagī tarz-e-āmādgī

us ko billī ke nazdīk le jā.egā

lamha-e-qurb meñ

sā.at-e-vasl meñ

us hasīna ke nāḳhun nikal ā.eñge

us udheḌ umr chūhe se shoḳhī kareñge

use hāñptā-kāñptā adh-muā chhoḌ kar

phir se malbūs-e-maḳhmal meñ chhup jā.eñge

dabe panw chalti chali aaegi

kisi garm kone mein chupke se baiThegi

bilauri aankhen ghumati rahegi

kabhi ek halki jamahi bhi legi

dekhte dekhte jism se uThne wali mahak

sare kamre mein bhar jaegi

dayar-e-ghariban se aaya hua ek udheD umr chuha

jo bas rizq ki bu ko pahchanta hai

jo har waqt bimar har waqt bezar chuhiya se tang aa chuka hai

use dekh lega to ji jaega

shauq-e-waraftagi tarz-e-amadgi

us ko billi ke nazdik le jaega

lamha-e-qurb mein

saat-e-wasl mein

us hasina ke naKHun nikal aaenge

us udheD umr chuhe se shoKHi karenge

use hanpta-kanpta adh-mua chhoD kar

phir se malbus-e-maKHmal mein chhup jaenge