bin phulon ke phal

yaad haiñ vo din

jab ham donoñ

qā'eda paḌhne masjid jaayā karte the

gūlar vaale peḌ ke nīche

saarī do-pahrī khelte the

yā Dālī-Dālī be-maqsad āvāra ghūmā karte the

maulvī sāhab kahte the

gūlar meñ bin phūloñ ke phal aate haiñ

phuul to pariyāñ raat ko chun le jaatī haiñ

aur ham tum ye phal khāte haiñ

phir ham donoñ ko un pariyoñ se milne kā shauq huā thā

shāyad tum ko yaad na ho

maulvī sāhab sach kahte the

ab vo pariyāñ mere paas bhī aatī haiñ

raat ko merī palkoñ se

vo motī chun le jaatī haiñ

aur phuul mujhe de jaatī haiñ

yaad hain wo din

jab hum donon

qa'eda paDhne masjid jaya karte the

gular wale peD ke niche

sari do-pahri khelte the

ya Dali-Dali be-maqsad aawara ghuma karte the

maulwi sahab kahte the

gular mein bin phulon ke phal aate hain

phul to pariyan raat ko chun le jati hain

aur hum tum ye phal khate hain

phir hum donon ko un pariyon se milne ka shauq hua tha

shayad tum ko yaad na ho

maulwi sahab sach kahte the

ab wo pariyan mere pas bhi aati hain

raat ko meri palkon se

wo moti chun le jati hain

aur phul mujhe de jati hain